పోలింగ్ కేంద్రాల వద్ద పటిష్ట భద్రతా చర్యలు

ఏలూరు, మేజర్ న్యూస్ :ఏలూరు మున్సిపల్ కార్పొరేషన్ ఎన్నికల నేపథ్యంలో1వ తేదీ ఆదివారం నిర్వహించ నున్న ఎన్నికల విధుల కోసం నియమితులైన సిబ్బందికి  జిల్లా ఎస్పీ  కె. ప్రతాప్ శివ కిషోర్ ఏలూరులోని సి.ఆర్. రెడ్డి పబ్లిక్ స్కూల్‌లో ఏర్పాటు చేసిన బ్యాలెట్ పేపర్ పంపిణీ కేంద్రం వద్ద విధుల నిర్వహణపై అవగాహన కార్యక్రమాన్ని నిర్వహించి దిశానిర్దేశం చేశారు.

ఈ సందర్భంగా ఎస్పీ  మాట్లాడుతూ, ఎన్నికల విధుల్లో పాల్గొనే ప్రతి సిబ్బంది తమకు కేటాయించిన బాధ్యతలను పూర్తిస్థాయి అప్రమత్తతతో, క్రమశిక్షణతో, నిష్పక్షపాతంగా నిర్వహించాలని సూచించారు.

 స్ట్రైకింగ్ ఫోర్స్, స్పెషల్ స్ట్రైకింగ్ ఫోర్స్‌తో పాటు పోలింగ్ కేంద్రాల వద్ద విధులు నిర్వర్తించే పోలీస్ సిబ్బంది పాటించాల్సిన విధివిధానాలు, చేయాల్సిన పనులు, నివారించాల్సిన చర్యలపై స్పష్టమైన అవగాహన కలిగి ఉండాలని ఆదేశించారు.

పోలింగ్ కేంద్రాల వద్ద పటిష్టమైన భద్రత ప్రతి పోలింగ్ కేంద్రం వద్ద సీసీ కెమెరాల పర్యవేక్షణ ఉంటుందని ఎస్పీ  తెలిపారు.

 పోలింగ్ కేంద్రాల పరిసరాల్లో 200 మీటర్ల పరిధిలో రాజకీయ ప్రచారాలు, ఓటర్లను ప్రభావితం చేసే చర్యలు, అనుమతి లేని గుంపులుగా చేరడం వంటి వాటికి అవకాశం లేకుండా నిబంధనల ప్రకారం చర్యలు తీసుకోవాలని సిబ్బందికి సూచించారు. పోలింగ్ కేంద్రాల పరిసర ప్రాంతాల్లో అమలులో ఉన్న నిషేధాజ్ఞలను కచ్చితంగా అమలు చేయాలని ఆదేశించారు.

 ఓటర్లు ఎలాంటి భయం, ఒత్తిడి, ప్రలోభాలకు లోనుకాకుండా స్వేచ్ఛగా తమ ఓటు హక్కును వినియోగించుకునేలా పోలీస్ సిబ్బంది భరోసా కల్పించాలని సూచించారు.

పోలింగ్ కేంద్రాల వద్ద శాంతిభద్రతల పరిరక్షణకు ప్రాధాన్యతనిస్తూ, సమస్యాత్మక పరిస్థితులు తలెత్తిన వెంటనే స్పందించాలని, అవసరమైన సందర్భాల్లో సంబంధిత అధికారులకు సమాచారం అందిస్తూ సమన్వయంతో పనిచేయాలని తెలిపారు. 

ఎన్నికల ప్రక్రియ ప్రశాంతంగా, సజావుగా జరిగేలా ప్రతి సిబ్బంది బాధ్యతాయుతంగా విధులు నిర్వర్తించాలని ఎస్పీ  దిశానిర్దేశం చేశారు.ఈ కార్యక్రమంలో ఏలూరు డీఎస్పీ డి శ్రావణ్ కుమార్  ఏలూరు టౌన్ ఇన్స్పెక్టర్లు సి ఐ  లు, ఎస్సైలు , పోలీస్ సిబ్బంది పాల్గొన్నారు.

 పసుమర్తి రాము జిల్లా ఇన్చార్జి ఏలూరు,