వైసీపీకి షాక్ ఇచ్చిన కూటమి. ఎమ్మెల్యే నల్లమిల్లి ఆధ్వర్యంలో వైసీపీ నుండి కూటమిలోకి పలువురు చేరిక.

అనపర్తి మేజర్ న్యూస్. అనపర్తి మండలం పెడపర్తి గ్రామంలో వైసీపీకి చెందిన 36 కుటుంబాలు టీడీపీ, బీజేపీ కూటమిలో చేరాయి. ఈ సందర్భంగా ఏర్పాటు చేసిన కార్యక్రమంలో పలువురు వైసీపీ నాయకులు, కార్యకర్తలకు టీడీపీ, బీజేపీ కండువాలు కప్పి కూటమిలోకి ఆహ్వానించారు.టీడీపీ ఇన్‌చార్జి నల్లమిల్లి మనోజ్‌రెడ్డి కొవ్వూరి కొండారెడ్డి, రామవరపు నాగూర్, తాడి వెంకటకృష్ణారెడ్డి, షేక్ సుభాన్ సాయిబ్, అనుపోజు వెంకట శ్రీనివాసుతో పాటు మరో 21 కుటుంబాలను టీడీపీలోకి ఆహ్వానించారు. అనపర్తి ఎమ్మెల్యే నల్లమిల్లి రామకృష్ణారెడ్డి మల్లిడి వెంకటేశ్వరరెడ్డి, తాడి వెంకటకృష్ణారెడ్డి, దొండపాటి విజయ్‌కుమార్, సత్తి శేషారత్నం, మేడపాటి ఆదిరెడ్డితో పాటు మరో ఐదు కుటుంబాలను బీజేపీలోకి ఆహ్వానించారు.

 ఈ సందర్భంగా ఎమ్మెల్యే నల్లమిల్లి రామకృష్ణారెడ్డి మాట్లాడుతూ  పెడపర్తి గ్రామంలో టీడీపీ, బీజేపీ బలోపేతానికి నాయకులు, కార్యకర్తలు సమన్వయంతో పనిచేస్తున్నారని అన్నారు. టీడీపీ, బీజేపీ, జనసేన కూటమి సమన్వయంతో ముందుకు సాగుతోందని తెలిపారు. రానున్న స్థానిక సంస్థల ఎన్నికల్లో గ్రామ పంచాయతీలు, ఎంపీటీసీ స్థానాల్లో కూటమి అభ్యర్థులను గెలిపించేందుకు నాయకులు కృషి చేయాలని పిలుపునిచ్చారు.కూటమి ప్రభుత్వం అధికారంలోకి వచ్చిన తర్వాత రాష్ట్రంలో అభివృద్ధి కార్యక్రమాలు వేగంగా జరుగుతున్నాయని ఎమ్మెల్యే పేర్కొన్నారు. 

అనపర్తి నియోజకవర్గంలో గత రెండేళ్లలో సుమారు రూ.1,200 కోట్ల అభివృద్ధి పనులు సాధించినట్లు తెలిపారు. అనపర్తి ఏరియా ఆసుపత్రికి సీఎస్ఆర్ నిధుల ద్వారా రూ.80 లక్షల విలువైన సదుపాయాలు సమకూరాయని చెప్పారు. జన్మభూమి రైలుకు అనపర్తిలో హాల్ట్‌ సాధించడం ద్వారా ప్రాంత ప్రజలకు ప్రయోజనం కలుగుతోందన్నారు.పెడపర్తిలో టీడీపీ, బీజేపీకి మరింత బలాన్ని చేకూర్చేలా నాయకులు, కార్యకర్తలు పనిచేయాలని, భవిష్యత్‌లో గ్రామ సర్పంచ్, ఎంపీటీసీ స్థానాలను కూటమి కైవసం చేసుకునేలా కృషి చేయాలని ఎమ్మెల్యే కోరారు. ఈ కార్యక్రమంలో అనపర్తి నియోజకవర్గ టీడీపీ అబ్జర్వర్ పర్వతనేని సురేష్‌తో పాటు నియోజకవర్గ, మండల, పెడపర్తి గ్రామానికి చెందిన కూటమి నాయకులు, కార్యకర్తలు పాల్గొన్నారు.