వైభవంగా మణవాళ మహామునుల వర్ష తిరు నక్షత్ర మహోత్సవం
నెల్లూరు నగరంలోని రంగనాయకుల పేటలో వెలసిన శ్రీ తల్పగిరి రంగనాథస్వామి దేవస్థానంలో శుక్రవారం శ్రీ మణవాళ మహామునుల వర్ష తిరు నక్షత్ర మహోత్సవం అత్యంత వైభవంగా జరిగింది.
ఈ సందర్భంగా ఉదయం శ్రీ మణవాళ మహామునులకు బంగారు పల్లకిలో పేట ఉత్సవం నిర్వహించారు. అనంతరం శ్రీదేవి భూదేవి సమేత శ్రీ రంగనాథస్వామికి, శ్రీ మణవాళ మహామునులకు వేద మంత్రోచ్ఛారణల నడుమ శాస్త్రోక్తంగా తిరుమంజనం జరిపారు. సాయంత్రం శ్రీదేవి భూదేవి సమేత శ్రీ రంగనాథస్వామి, శ్రీ మణవాళ మహామునుల పేట ఉత్సవం వేడుకగా సాగింది. ఈ కార్యక్రమానికి ముప్పిరాల నరసింహాచార్యులు నిర్దిష్ట ధర్మాదాయం నుంచి దేవస్థానం ఉభయకర్తలుగా వ్యవహరించింది.
ఉత్సవంలో దేవస్థాన కార్యనిర్వహణాధికారి ఆళ్ళ శ్రీనివాస రెడ్డి, దేవస్థాన చైర్మన్ లెక్కల వెంకట రెడ్డి, ధర్మకర్తల మండలి సభ్యులు ఎక్స్-అఫీషియో సభ్యుడు దొరస్వామితో పాటు దేవస్థానం అర్చకులు, సిబ్బంది, భక్తులు పాల్గొన్నారు.
