వాల్మీకి మహర్షి అడుగుజాడల్లో నడుద్దాం... ఎమ్మెల్యే అమిలినేని.

 కళ్యాణదుర్గం: మహర్షి వాల్మీకి చూపిన మార్గంలో ప్రతి ఒక్కరూ నడుస్తూ ఆయన ఆశయాలను ఆదర్శంగా తీసుకోవాలని కళ్యాణదుర్గం ఎమ్మెల్యే అమిలినేని సురేంద్రబాబు పిలుపునిచ్చారు. సోమవారం పట్టణంలోని ప్రజావేదికలో స్థానిక వాల్మీకి సోదరులు, మహిళా నాయకురాళ్లతో కలిసి మహర్షి వాల్మీకి జయంతి వేడుకలను అంగరంగ వైభవంగా నిర్వహించారు. ఈ సందర్భంగా వాల్మీకి మహర్షి చిత్రపటానికి పూలమాలలు వేసి ఘనంగా నివాళులర్పించారు. అనంతరం ఎమ్మెల్యే మాట్లాడుతూ మహర్షి వాల్మీకి రచించిన రామాయణం సమాజానికి విలువైన సందేశాన్ని అందిస్తోందని, ఆయన జీవితం ప్రతి ఒక్కరికీ స్ఫూర్తిదాయకమని పేర్కొన్నారు. గత వైఎస్సార్ కాంగ్రెస్ పార్టీ ప్రభుత్వ హయాంలో అభివృద్ధి కుంటుపడిందని, అవినీతి, అక్రమాలతో ప్రజలు ఇబ్బందులు ఎదుర్కొన్నారని ఎమ్మెల్యే అమిలినేని విమర్శించారు. రాష్ట్రంలో కొన్ని ప్రాంతాల్లో రాజకీయ ఘర్షణలు చోటుచేసుకుంటున్నప్పటికీ, కళ్యాణదుర్గంలో అన్ని రాజకీయ పార్టీల నాయకులు ప్రశాంత వాతావరణంలో నామినేషన్లు దాఖలు చేసుకోవడం కూటమి ప్రభుత్వ విజయమని పేర్కొన్నారు. ఎన్నికల ప్రక్రియలో ఎలాంటి గొడవలు, అల్లర్లు చోటుచేసుకోకుండా ప్రశాంత వాతావరణం నెలకొనడం సంతోషకరమన్నారు. ప్రజాస్వామ్య పద్ధతిలో ఎన్నికలు జరగాలని, అన్ని పార్టీలు చట్టాలను గౌరవిస్తూ వ్యవహరించాలని సూచించారు. కళ్యాణదుర్గం పట్టణంలో తాగునీటి సమస్య పరిష్కారానికి ప్రభుత్వం ప్రత్యేక చర్యలు చేపడుతోందని ఎమ్మెల్యే తెలిపారు. పట్టణంలోని సుమారు 13 వేల ఇళ్లకు కుళాయి కనెక్షన్లు అందించేందుకు రూ.179 కోట్లతో పనులు జరుగుతున్నాయని వెల్లడించారు. గతంలో ఉమ్మడి అనంతపురం జిల్లాకు తాగునీరు అందించేందుకు భగవాన్ సత్యసాయి బాబా చేపట్టిన సేవలను గుర్తుచేశారు. అయితే నీటి సరఫరా నిర్వహణలో కార్మికులకు వేతన బకాయిలు పేరుకుపోవడంతో సమస్యలు తలెత్తాయని పేర్కొన్నారు. భవిష్యత్తులో ప్రజలకు తాగునీటి సరఫరాలో ఎలాంటి ఇబ్బందులు కలగకుండా చర్యలు తీసుకుంటామని హామీ ఇచ్చారు. కళ్యాణదుర్గం నియోజకవర్గ అభివృద్ధికి కూటమి ప్రభుత్వం కట్టుబడి ఉందని అమిలినేని సురేంద్రబాబు స్పష్టం చేశారు. బీటీపీతో పాటు నియోజకవర్గంలోని అన్ని చెరువులకు 2028 మార్చి నాటికి కృష్ణా జలాలు అందించే లక్ష్యంతో ముందుకు సాగుతున్నామని తెలిపారు. ఇటీవల చాపిరి చెరువుకు నీరు అందించడం తనకు ఎంతో సంతోషాన్ని కలిగించిందని, దీంతో ప్రజల్లో ప్రభుత్వంపై నమ్మకం మరింత పెరిగిందని అన్నారు. తనను నమ్మి ఎమ్మెల్యేగా గెలిపించిన ప్రజలకు ఎప్పటికీ రుణపడి ఉంటానని పేర్కొన్నారు. కళ్యాణదుర్గం పట్టణంలో ప్రజలు ఊహించని రీతిలో అభివృద్ధి పనులు చేపడుతున్నామని, మౌలిక సదుపాయాల కల్పనకు ప్రాధాన్యత ఇస్తున్నామని వివరించారు. రాబోయే మున్సిపల్ ఎన్నికల్లో కూటమి అభ్యర్థులకు ఓటు వేసి అఖండ మెజారిటీతో గెలిపించాలని ఎమ్మెల్యే అమిలినేని సురేంద్రబాబు ప్రజలను కోరారు. పట్టణ అభివృద్ధి, తాగునీటి సమస్య పరిష్కారం, చెరువులకు కృష్ణా జలాల సరఫరా వంటి లక్ష్యాలను సాధించేందుకు ప్రజల సహకారం అవసరమని తెలిపారు. అభివృద్ధిని కొనసాగించేందుకు కూటమి అభ్యర్థులకు మద్దతు ఇవ్వాలని విజ్ఞప్తి చేశారు. వాల్మీకి జయంతి వేడుకల్లో వాల్మీకి సోదరులు, మహిళా నాయకురాళ్లు, స్థానిక నాయకులు, కార్యకర్తలు పాల్గొన్నారు.