ఉరవకొండలో ప్రజాదర్బార్.. ప్రజల నుంచి అర్జీలు స్వీకరించిన మంత్రి పయ్యావుల కేశవ్

అనంతపురం బ్యూరో: ఉరవకొండ పట్టణంలోని రాష్ట్ర ఆర్థిక శాఖ మంత్రి పయ్యావుల కేశవ్ క్యాంపు కార్యాలయంలో బుధవారం ప్రజాదర్బార్ కార్యక్రమం నిర్వహించారు. ఈ సందర్భంగా అనంతపురం జిల్లా, ఉరవకొండ నియోజకవర్గ పరిధిలోని వివిధ మండలాల నుంచి వచ్చిన ప్రజలు తమ సమస్యలను మంత్రి దృష్టికి తీసుకెళ్లారు.

వివిధ సమస్యలపై ప్రజలు, స్థానిక నాయకులు సమర్పించిన అర్జీలను మంత్రి పయ్యావుల కేశవ్ స్వీకరించి, వాటి వివరాలను అడిగి తెలుసుకున్నారు. ప్రజలు ఎదుర్కొంటున్న సమస్యలను పరిశీలించి, వాటి పరిష్కారానికి సంబంధిత అధికారులతో మంత్రి ఫోన్ ద్వారా మాట్లాడారు.

అర్జీదారుల సమస్యలను సాధ్యమైనంత త్వరగా పరిష్కరించాలని సంబంధిత అధికారులను మంత్రి ఆదేశించారు. ప్రజల నుంచి వచ్చిన వినతులను అధికారులు పరిశీలించి, నిబంధనల మేరకు తగిన చర్యలు తీసుకోవాలని సూచించారు.

ప్రజాదర్బార్‌లో వివిధ మండలాల నుంచి పెద్ద సంఖ్యలో ప్రజలు పాల్గొని తమ సమస్యలను మంత్రికి విన్నవించారు.