తూర్పుగోదావరి జిల్లా చాగల్లు మండలంలో పెద్దపులి సంచారం: తోటల్లో కనిపించడంతో వణికిపోతున్న స్థానికులు.. ఒంటరిగా పొలాల్లోకి వెళ్లొద్దని అటవీశాఖ హెచ్చరిక!
సూర్య క్రైమ్ & జిల్లా డెస్క్: తూర్పుగోదావరి జిల్లా చాగల్లు మండల పరిసరాల్లో పెద్దపులి సంచారం స్థానికంగా తీవ్ర కలకలం రేపుతోంది. కొబ్బరి, కోకో తోటలు, పంట పొలాల మధ్య పెద్దపులి దర్జాగా తిరుగుతున్న దృశ్యాలు కనిపించడంతో పరిసర గ్రామాల ప్రజలు, రైతులు భయాందోళనలకు గురవుతున్నారు. చిక్కాలపాలెం, అమ్మిగుంట తదితర ప్రాంతాల్లో పులి కదలికలు స్పష్టంగా కనిపించడంతో అటవీ శాఖ అధికారులు రంగంలోకి దిగి హై అలర్ట్ ప్రకటించారు.
గత కొద్ది రోజులుగా తాళ్లపూడి, నిడదవోలు తదితర మండలాల్లో తిరుగుతూ వచ్చిన పెద్దపులి ఇప్పుడు చాగల్లు వైపు ప్రవేశించినట్లు అధికారులు గుర్తించారు. రోజులుగా సరైన ఆహారం దొరక్కపోవడంతో పులి కాస్త నీరసించి ఉంటుందని అటవీ శాఖ భావిస్తోంది. డ్రోన్ కెమెరాలు, జియో-ట్రాకింగ్ పరికరాల సాయంతో అధికారులు దాని అడుగుజాడలను అనుక్షణం పర్యవేక్షిస్తున్నారు. పులిని సురక్షితంగా బంధించి అటవీ ప్రాంతానికి తరలించేందుకు ప్రత్యేక రెస్క్యూ బృందాలు ఏర్పాట్లు చేస్తున్నాయి.
రైతులు, కూలీలు ఒంటరిగా పొలాల్లోకి, తోటల్లోకి వెళ్లవద్దని అధికారులు గట్టిగా హెచ్చరిస్తున్నారు. పులి కనిపించినా దానిని వెంబడించడం, రాళ్లు రువ్వడం వంటి సాహసాలకు పాల్పడవద్దని, వెంటనే అటవీ లేదా పోలీసు శాఖ అధికారులకు సమాచారం అందించాలని సూచించారు. రాత్రి వేళల్లో గ్రామస్తులు గుంపులుగా ఉండాలని, తగిన జాగ్రత్తలు తీసుకోవాలని గ్రామాల్లో దండోరా వేయించి అప్రమత్తం చేస్తున్నారు.
