తమిళనాడు పెట్టుబడుల లీక్ ప్రచారంపై మంత్రి లోకేష్ చమత్కార కౌంటర్
అమరావతి: పొరుగు రాష్ట్రం తమిళనాడులో పెట్టుబడుల సమాచారం లీక్ అయిందంటూ జరుగుతున్న ప్రచారంపై ఆంధ్రప్రదేశ్ ఐటీ, పరిశ్రమల శాఖ మంత్రి నారా లోకేష్ తనదైన శైలిలో చమత్కారంగా స్పందించారు. ఏపీకి తరలివస్తున్న పెట్టుబడుల వెనుక ఉన్న అసలు రహస్యం ఇదేనంటూ ఆయన ‘ఎక్స్’ (X) వేదికగా చేసిన పోస్ట్ ఇప్పుడు రాజకీయ, పారిశ్రామిక వర్గాల్లో ఆసక్తికర చర్చకు దారితీసింది.
అసలేం జరిగింది?
తమిళనాడు పెట్టుబడుల ప్రోత్సాహక సంస్థ ‘గైడెన్స్ తమిళనాడు’ (Guidance Tamil Nadu) కు చెందిన సుమారు 15 మంది అధికారులను అక్కడి ప్రభుత్వం ఇటీవల తొలగించినట్లు వార్తలు వచ్చాయి. ఆ రాష్ట్రానికి రావాల్సిన పెట్టుబడుల సమాచారం, వ్యూహాలు ఆంధ్రప్రదేశ్కు చేరుతున్నాయన్న అనుమానాలతోనే ఈ చర్యలు తీసుకున్నారని ప్రచారం జరిగింది.
లోకేష్ వ్యంగ్యాస్త్రాలు
ఈ లీక్ వివాదంపై పరోక్షంగా స్పందించిన మంత్రి నారా లోకేష్, సోషల్ మీడియా వేదికగా పొరుగు రాష్ట్రానికి చురకలు అంటించారు. "ఆంధ్రప్రదేశ్ అత్యంత రహస్య పెట్టుబడుల వ్యూహం లీక్ అయింది. అదేంటంటే — 'ఇన్వెస్టర్లకు అదే రోజు సమాధానం ఇవ్వడం'. కావాలంటే ఎవరైనా దీన్ని నిరభ్యంతరంగా కాపీ చేసుకోవచ్చు" అని ఆయన వ్యంగ్యంగా ట్వీట్ చేశారు. పారిశ్రామికవేత్తల సందేహాలకు తక్షణమే స్పందించడం, వేగంగా అనుమతులు మంజూరు చేయడమే తమ ప్రభుత్వ విజయ రహస్యమని ఆయన ఈ ట్వీట్ ద్వారా స్పష్టం చేశారు.
రాజకీయ విమర్శలు - వివరణలు
మరోవైపు, ఈ వ్యవహారంపై ఇరు రాష్ట్రాల నేతల మధ్య మాటల యుద్ధం నడుస్తోంది. డేటా లీక్ ఆరోపణలను ఏపీ టీడీపీ రాష్ట్ర అధ్యక్షుడు పల్లా శ్రీనివాసరావు తోసిపుచ్చారు. తమ ప్రభుత్వ పారదర్శక పారిశ్రామిక విధానాలు, అనుకూల వాతావరణాన్ని చూసే కంపెనీలు ఏపీకి వస్తున్నాయని, ఇతర రాష్ట్రాల వ్యూహాలను కాపీ కొట్టాల్సిన అవసరం తమకు లేదని ఆయన స్పష్టం చేశారు. కాగా, తమిళనాడు మాజీ మంత్రి, డీఎంకే నేత టీఆర్బీ రాజా స్పందిస్తూ.. ప్రస్తుత టీవీకే (TVK) ప్రభుత్వం అధికారులను గౌరవించడంలో విఫలమైందని విమర్శించారు. ఉద్యోగుల మార్పులు సహజ ప్రక్రియ మాత్రమేనని, ఇందులో ఎలాంటి నిఘా లేదా క్రిమినల్ చర్యలు లేవని తమిళనాడు అధికార వర్గాలు వివరణ ఇచ్చాయి.