ఆదిభట్ల శ్రీచైతన్య కాలేజీలో విషాదం.. విద్యార్థి ఆత్మహత్య
ఆదిభట్ల (రంగారెడ్డి జిల్లా): రంగారెడ్డి జిల్లా ఆదిభట్ల పోలీస్ స్టేషన్ పరిధిలోని శ్రీచైతన్య జూనియర్ కళాశాలలో విషాద ఘటన చోటుచేసుకుంది. కళాశాల యాజమాన్యం సెలవు నిరాకరించిందన్న మనస్తాపంతో కార్తీక్ అనే విద్యార్థి ఆత్మహత్యకు పాల్పడ్డాడు. ఈ ఘటన స్థానికంగా తీవ్ర కలకలం రేపింది.
అసలేం జరిగింది?
కళాశాలలో చదువుతున్న కార్తీక్ ఇటీవల ఇంటికి వెళ్లేందుకు సెలవు కావాలని యాజమాన్యాన్ని కోరినట్లు తెలుస్తోంది. అయితే, కళాశాల సిబ్బంది సెలవు ఇచ్చేందుకు నిరాకరించడంతో తీవ్ర మనస్తాపానికి గురైన కార్తీక్ ఆత్మహత్య చేసుకున్నాడు.
యాజమాన్యంపై ఆరోపణలు.. ఆందోళనలు
విద్యార్థి ఆత్మహత్య చేసుకున్న విషయాన్ని బయటకు పొక్కనీయకుండా, కనీసం తల్లిదండ్రులకు లేదా పోలీసులకు సరైన సమాచారం ఇవ్వకుండానే కళాశాల యాజమాన్యం గుట్టుచప్పుడు కాకుండా మృతదేహాన్ని అక్కడి నుంచి తరలించిందని తీవ్ర ఆరోపణలు వెల్లువెత్తుతున్నాయి.
కార్తీక్ మృతి విషయం తెలుసుకున్న విద్యార్థి సంఘాల నాయకులు, కార్యకర్తలు పెద్ద ఎత్తున కళాశాలకు చేరుకుని ప్రధాన ద్వారం ఎదుట ఆందోళనకు దిగారు. యాజమాన్యం నిర్లక్ష్యం వల్లే విద్యార్థి ప్రాణాలు కోల్పోయాడని ఆరోపిస్తూ నినాదాలు చేశారు. బాధ్యులపై కఠిన చర్యలు తీసుకోవాలని, మృతుడి కుటుంబానికి న్యాయం చేయాలని డిమాండ్ చేశారు. సమాచారం అందుకున్న పోలీసులు ఘటనా స్థలానికి చేరుకుని పరిస్థితిని సమీక్షిస్తున్నారు.