తైలాభిషేకాలతో శనేశ్వరాలయం…దర్శనానికి పోటెత్తిన భక్తులుస్వా మివారికి రూ.5.16 లక్షల ఆదాయం

కొత్తపేట,మేజర్ న్యూస్:అమావాస్య పర్వదినాన్ని పురస్కరించుకుని మందపల్లి శ్రీ మందేశ్వర (శనేశ్వర) స్వామివారి ఆలయానికి శనివారం భక్తులు పెద్దఎత్తున తరలివచ్చారు.తెల్లవారుజాము నుంచే వివిధ ప్రాంతాల నుంచి భక్తులు ఆలయానికి చేరుకుని స్వామివారిని దర్శించుకున్నారు.

దీంతో ఆలయ ప్రాంగణం భక్తులతో సందడిగా మారింది.అమావాస్య సందర్భంగా ఆలయంలో ప్రాతఃకాల అర్చనలు,ప్రత్యేక పూజలు నిర్వహించారు.అనంతరం భక్తులు స్వామివారికి భక్తిశ్రద్ధలతో తైలాభిషేకాలు సమర్పించి,సర్వదర్శనం చేసుకున్నారు.స్వామివారిని దర్శించుకుని మొక్కులు చెల్లించుకునేందుకు భక్తులు బారులు తీరారు.భక్తుల రద్దీని దృష్టిలో ఉంచుకుని ఆలయ అధికారులు ప్రత్యేక ఏర్పాట్లు చేశారు.ఆలయ సహాయ కమిషనర్,కార్యనిర్వహణాధికారి దారపురెడ్డి సురేష్‌బాబు ఆధ్వర్యంలో భక్తులకు అవసరమైన సౌకర్యాలు కల్పించారు.

దర్శనం,తైలాభిషేకాల నిర్వహణతో పాటు భక్తుల రాకపోకలకు ఎలాంటి ఇబ్బందులు కలగకుండా ఆలయ సిబ్బంది తగిన జాగ్రత్తలు తీసుకున్నారు.అమావాస్య సందర్భంగా ఆలయంలో నిర్వహించిన వివిధ సేవలు, తైలాభిషేకాల ద్వారా స్వామివారికి రూ.5,16,431 ఆదాయం సమకూరినట్లు ఆలయ ఈవో సురేష్‌బాబు తెలిపారు.