సంక్షేమం, అభివృద్ధిని వివరిస్తూ మంజుప్రియ వెంకటేష్ ఎన్నికల ప్రచారం
గుడిపల్లి మేజర్ న్యూస్: మండలంలోని కుప్పిగానిపల్లి, పీబీ వాడ ఎంపీటీసీ సెగ్మెంట్ల పరిధిలో జడ్పీటీసీ అభ్యర్థి మంజుప్రియ వెంకటేష్ విస్తృతంగా ఎన్నికల ప్రచారం నిర్వహించారు. ఈ సందర్భంగా ఆయా గ్రామాల్లో ఇంటింటికీ వెళ్లి ఓటర్లను, గ్రామ పెద్దలను, మహిళలను, యువతను ఆప్యాయంగా కలుసుకుని ఓట్లు అభ్యర్థించారు.
రాష్ట్ర ముఖ్యమంత్రి నారా చంద్రబాబు నాయుడు నాయకత్వంలో కూటమి ప్రభుత్వం చేపడుతున్న సంక్షేమ పథకాలు, అభివృద్ధి కార్యక్రమాలను ప్రజలకు వివరించారు. ముఖ్యంగా పేద కుటుంబాల సంక్షేమం, మహిళల అభ్యున్నతి, రైతులకు అండగా నిలిచే కార్యక్రమాలు, యువతకు ఉపాధి అవకాశాలు, గ్రామీణ ప్రాంతాల్లో మౌలిక సదుపాయాల అభివృద్ధికి ప్రభుత్వం కల్పిస్తున్న ప్రాధాన్యతను వివరించారు.
ఈ సందర్భంగా మంజుప్రియ వెంకటేష్ మాట్లాడుతూ.. ముఖ్యమంత్రి చంద్రబాబు నాయుడు నాయకత్వంలో కుప్పం నియోజకవర్గం అభివృద్ధి దిశగా ముందుకు సాగుతోందని, గ్రామాల్లో తాగునీరు, రహదారులు, పారిశుద్ధ్యం, వీధి దీపాలు తదితర మౌలిక సదుపాయాల కల్పనకు కృషి చేస్తామని తెలిపారు. ప్రజలకు ఎలాంటి సమస్యలు ఎదురైనా వారి పక్షాన నిలబడి పరిష్కారానికి కృషి చేస్తానని భరోసా ఇచ్చారు.
జడ్పీటీసీగా అవకాశం కల్పిస్తే గుడిపల్లి మండలంలోని అన్ని గ్రామాల అభివృద్ధికి సమాన ప్రాధాన్యతనిస్తూ, ప్రజలకు అందుబాటులో ఉంటూ సేవలందిస్తానని పేర్కొన్నారు. ఎన్నికల్లో ప్రజల మద్దతు, ఆశీర్వాదం కోరుతూ ప్రచారాన్ని కొనసాగించారు.
ఈ ప్రచార కార్యక్రమంలో కూటమి నాయకులు, తెలుగుదేశం పార్టీ శ్రేణులు, మహిళా కార్యకర్తలు, యువకులు, స్థానిక నాయకులు పాల్గొని అభ్యర్థికి మద్దతుగా ప్రచారం నిర్వహించారు.
రిపోర్టర్ :-లెనిన్ బాబు గుడిపల్లి మండలం సూర్య
