శ్రీశైలంలో ప్రారంభమైన కార్తీక మాసోత్సవాలు: అభిషేకాలు, స్పర్శ దర్శనాలపై దేవస్థానం కీలక నిర్ణయం

శ్రీశైలం :శ్రీశైలం మల్లన్న క్షేత్రంలో నేటి నుంచి వచ్చేనెల 9వ తేదీ వరకు కార్తీక మాసోత్సవాలు ఘనంగా జరగనున్నాయి. ఈ పవిత్ర మాసమంతా ఆలయానికి భక్తుల రద్దీ అత్యధికంగా ఉండే అవకాశం ఉండటంతో, దేవస్థానం అధికారులు దర్శనాలు మరియు పూజా కార్యక్రమాల్లో పలు మార్పులు చేశారు. భక్తులందరికీ సజావుగా దర్శనం కల్పించేందుకు గాను మాసమంతా గర్భాలయ అభిషేకాలు, సామూహిక అభిషేకాలను పూర్తిగా నిలిపివేస్తున్నట్లు ప్రకటించారు.

అలాగే రద్దీ ఎక్కువగా ఉండే కార్తీక శని, ఆది, సోమవారాలతో పాటు కార్తీక పౌర్ణమి, ఏకాదశి వంటి విశేష రోజులలో శ్రీస్వామివారి స్పర్శ దర్శనాలను రద్దు చేశారు. అయితే, మిగిలిన సాధారణ రోజులలో మాత్రం భక్తుల సౌకర్యార్థం రోజుకు 5 విడతలుగా స్పర్శ దర్శనానికి అవకాశం కల్పించనున్నారు. శ్రీగిరి యాత్రకు వచ్చే భక్తులు ఈ మార్పులను గమనించి దైవదర్శనానికి తగిన విధంగా ఏర్పాట్లు చేసుకోవాలని దేవస్థానం అధికారులు సూచించారు.