శ్రీకన్యకా పరమేశ్వరి ఆలయంలో శరన్నవరాత్రి ఉత్సవాలు ప్రారంభం

నెల్లూరు, కల్చరల్ (మేజర్ న్యూస్):
నగరంలోని శ్రీకన్యకా పరమేశ్వరి దేవస్థానంలో శరన్నవరాత్రి మహోత్సవాలు ఆదివారం భక్తిశ్రద్ధలతో ప్రారంభమయ్యాయి.ఉత్సవాలను పురస్కరించుకుని ఆలయాన్ని సర్వాంగ సుందరంగా అలంకరించడంతోపాటు ప్రధాన వీధుల్లో విద్యుత్ దీపాలను ఏర్పాటు చేశారు. ఆలయ పరిసరాలు భక్తులను ఆకట్టుకునేలా ముస్తాబు కాగా, ఉత్సవాల నిర్వహణను శ్రీ వాసవి కన్యకా పరమేశ్వరి దసరా ఉత్సవ కమిటీ ప్రతినిధులు పర్యవేక్షించారు.ఉత్సవాల తొలిరోజు శ్రీ రంగనాథ స్వామి దేవస్థానం నుంచి 1008 మంది మహిళలు కలశాలతో ఊరేగింపుగా బయలుదేరి ఆలయానికి చేరుకున్నారు. అనంతరం మండపారాధన, కలశ స్థాపన కార్యక్రమాలను శాస్త్రోక్తంగా నిర్వహించారు.సాయంత్రం 6 నుంచి రాత్రి 8 గంటల వరకు అమ్మవారికి సహస్రనామార్చనతో పాటు కుంకుమ పూజ నిర్వహించారు. శ్రీ పీఠం గురువులు, శ్రీ కన్యకా పరమేశ్వరి దేవస్థానం ప్రధాన అర్చకులు లలిత శివకుమార్ స్వామి ఆధ్వర్యంలో కలశ స్థాపన, అమ్మవారికి భవాని అలంకరణ కార్యక్రమాలు జరిగాయి. ప్రత్యేక అలంకరణలో అమ్మవారు భక్తులకు దర్శనమిచ్చారు.ఈ కార్యక్రమంలో ఆలయ ధర్మకర్తల మండలి చైర్మన్ కోట గురుబ్రహ్మం, గౌరవ అధ్యక్షుడు కొండ ప్రవీణ్ శంకర్, కార్యనిర్వాహక అధ్యక్షుడు శేగు షణ్ముగరావు, ప్రధాన కార్యదర్శి చిరంజీవి, కోశాధికారి జనార్దన్ రావు, ఉపాధ్యక్షుడు వేముల ప్రసాద్, సంయుక్త కార్యదర్శి మునగ వెంకటేశ్వర్లు, గౌరవ సలహాదారు ఆంజనేయులు, కమిటీ సభ్యులు పాల్గొన్నారు. పెద్ద సంఖ్యలో భక్తులు ఆలయానికి చేరుకుని అమ్మవారిని దర్శించుకుని తీర్థప్రసాదాలు స్వీకరించారు. శరన్నవరాత్రి ఉత్సవాల ప్రారంభంతో ఆలయంలో ఆధ్యాత్మిక సందడి నెలకొంది.