*అన్నపూర్ణ అక్షయపాత్ర ఆధ్వర్యంలో నిర్విరామంగా అన్నదానం.

పేదలకు భక్తులకు స్వయంగా వడ్డించిన చింతకాయల పద్మావతి*
నర్సీపట్నం అక్టోబర్ 12 మేజర్ న్యూస్ :
​అన్నపూర్ణ అక్షయపాత్ర ఆధ్వర్యంలో స్థానిక మరిడి మహాలక్ష్మి అమ్మవారి ఆలయం వద్ద ప్రతి సోమవారం నిర్వహిస్తున్న అన్నదాన కార్యక్రమంలో చింతకాయల పద్మావతి  పాల్గొన్నారు. ఈ సందర్భంగా ఆమె పేదలకు, భక్తులకు తన చేతుల మీదుగా స్వయంగా అన్నప్రసాదాన్ని వడ్డించారు. అనంతరం పద్మావతి  మాట్లాడుతూ.. ప్రతి పేదవాడికి కనీసం ఒక పూట అయినా కడుపు నింపాలన్న సత్సంకల్పంతో అన్నపూర్ణ అక్షయపాత్ర ఆధ్వర్యంలో చేపట్టిన ఈ అన్నదాన కార్యక్రమం దిగ్విజయంగా కొనసాగుతోందని హర్షం వ్యక్తం చేశారు.
​కరోనా విపత్కర పరిస్థితులు ఎదురైనప్పటికీ, తుఫానులు విరుచుకుపడిన సమయాల్లోనూ ఏ ఒక్క సోమవారం కూడా ఆటంకం లేకుండా ఈ అన్నదాన కార్యక్రమం కొనసాగడం గొప్ప విషయమని ఆమె కొనియాడారు. ఇప్పటివరకు ఈ కార్యక్రమం ద్వారా ఏకంగా కోటి ప్లేట్లకు పైగా అన్నదానం చేయడం అభినందనీయమన్నారు. ఇంతటి బృహత్తరమైన అన్నదాన కార్యక్రమంలో ప్రతి ఒక్కరూ భాగస్వాములు కావాలని, అలాగే భక్తులంతా విచ్చేసి అమ్మవారి అన్నప్రసాదాన్ని స్వీకరించాలని ఈ సందర్భంగా చింతకాయల పద్మావతి  పిలుపునిచ్చారు.