సీఐఐ భాగస్వామ్య సదస్సు సూపర్ హిట్ తొలిరోజే రూ.5,84,355 కోట్ల పెట్టుబడులకు ఒప్పందాలు

నెల్లూరు,  మేజర్ న్యూస్ :     రాష్ట్ర ప్రభుత్వం ప్రతిష్టాత్మకంగా నిర్వహించిన సీఐఐ భాగస్వామ్య సదస్సు సూపర్ హిట్ అయిందని ఏపీ వక్ఫ్ బోర్డు చైర్మన్ అబ్దుల్ అజీజ్ పేర్కొన్నారు. ముఖ్యమంత్రి నారా చంద్రబాబు నాయుడు దూరదృష్టి, మంత్రి నారా లోకేష్ నిరంతర కృషితో రాష్ట్రంపై పారిశ్రామికవేత్తల విశ్వాసం పెరిగిందని ఒక ప్రకటనలో తెలిపారు. తొలిరోజే 73 ఎంఓయూలు, 15 జీవోల ద్వారా రూ.5,84,355 కోట్ల పెట్టుబడులు, 1,07,693 ఉద్యోగాల కల్పనకు సంబంధించిన ఒప్పందాలు జరగడం రాష్ట్ర పారిశ్రామిక ప్రగతిలో కీలక ముందడుగని అన్నారు. రిలయన్స్ రూ.2.73 లక్షల కోట్లు, గ్రీన్‌కో రూ.45 వేల కోట్లు, పంచశీల్ రూ.37 వేల కోట్లు, ఏఎంఏఐ ఫ్యాక్టరీ రూ.31,387 కోట్లు, కియా రూ.18,878 కోట్ల పెట్టుబడుల ప్రతిపాదనలు రాష్ట్ర ఆర్థికాభివృద్ధికి ఊతమిస్తాయని పేర్కొన్నారు. రెండున్నరేళ్లలో 714 ప్రాజెక్టుల ద్వారా రూ.22.6 లక్షల కోట్ల పెట్టుబడుల ప్రతిపాదనలు, 19.3 లక్షల ఉద్యోగాలకు అవకాశం ఏర్పడటం కూటమి ప్రభుత్వ కృషికి నిదర్శనమన్నారు. వీటిలో ఇప్పటికే రూ.11 లక్షల కోట్ల పెట్టుబడులకు సంబంధించిన ప్రాజెక్టులు గ్రౌండింగ్ దశకు చేరుకున్నాయని తెలిపారు. వేగం, స్థిరత్వం, సేవ అనే మూడు సూత్రాలతో ప్రభుత్వం పరిశ్రమలకు సహకారం అందిస్తోందన్నారు. ‘స్పీడ్ ఆఫ్ డూయింగ్ బిజినెస్’ విధానంతో అనుమతులను వేగవంతం చేస్తూ, ఒప్పందాలను పరిశ్రమలుగా, పెట్టుబడులను యువతకు ఉద్యోగాలుగా మార్చడమే ప్రభుత్వ లక్ష్యమని వివరించారు. భారీ పరిశ్రమల ఏర్పాటుతో అనుబంధ పరిశ్రమలు, రవాణా, చిన్న వ్యాపారాలు, సేవా రంగాల్లోనూ ఉపాధి అవకాశాలు పెరుగుతాయని పేర్కొన్నారు. స్వర్ణాంధ్ర నిర్మాణానికి బాటలు వేస్తూ రాష్ట్రానికి భారీ పెట్టుబడులను ఆకర్షిస్తున్న ముఖ్యమంత్రి చంద్రబాబు నాయుడు, మంత్రి నారా లోకేష్‌కు అబ్దుల్ అజీజ్ కృతజ్ఞతలు తెలిపారు.