రాత్రి 8 గంటల్లోగా పూర్తి ఫలితాలు వెల్లడయ్యే అవకాశం

నెల్లూరు కలెక్టరేట్,  మేజర్ న్యూస్ :   నెల్లూరు జిల్లాలో జెడ్పీటీసీ, ఎంపీటీసీ ఎన్నికల ఓట్ల లెక్కింపు ప్రక్రియ ప్రశాంత వాతావరణంలో కొనసాగుతోంది. రాత్రి 8 గంటల్లోగా పూర్తి ఫలితాలు వెల్లడయ్యే అవకాశం ఉందని జిల్లా కలెక్టర్ హిమాన్షు శుక్లా తెలిపారు. కౌంటింగ్ ప్రక్రియను అధికారులు సమన్వయంతో, అంకితభావంతో నిర్వహిస్తున్నారని పేర్కొన్నారు. ఎలాంటి అవాంఛనీయ సంఘటనలకు తావులేకుండా పటిష్టమైన భద్రతా ఏర్పాట్ల మధ్య ఓట్ల లెక్కింపు చేపడుతున్నట్లు వెల్లడించారు.  శనివారం నెల్లూరులోని వీఆర్ పీజీ కళాశాలలో ఏర్పాటు చేసిన జెడ్పీటీసీ, ఎంపీటీసీ ఎన్నికల కౌంటింగ్ కేంద్రాన్ని జిల్లా కలెక్టర్ హిమాన్షు శుక్లా, జాయింట్ కలెక్టర్ మొగిలి వెంకటేశ్వర్లు సందర్శించి కౌంటింగ్ ప్రక్రియను పరిశీలించారు. ఓట్ల లెక్కింపు నిర్వహణ, సిబ్బంది విధులు, ఫలితాల నమోదు తదితర అంశాలను సమీక్షించారు. ఎలాంటి పొరపాట్లకు తావులేకుండా ఎన్నికల నిబంధనలను ఖచ్చితంగా పాటిస్తూ విధులు నిర్వహించాలని అధికారులకు సూచించారు.  అనంతరం గూడూరులోని ఎస్వీ ఆర్ట్స్ కళాశాలలో ఏర్పాటు చేసిన కౌంటింగ్ కేంద్రాన్ని కూడా కలెక్టర్ సందర్శించారు. అక్కడ ఓట్ల లెక్కింపు తీరును పరిశీలించి రిటర్నింగ్ అధికారులకు పలు సూచనలు చేశారు. జిల్లాలోని ఆరు కౌంటింగ్ కేంద్రాల్లో ఓట్ల లెక్కింపు ప్రశాంతంగా కొనసాగుతోందని, అధికారులు సమర్థవంతంగా విధులు నిర్వహిస్తున్నారని తెలిపారు. కౌంటింగ్ కేంద్రాల వద్ద ఎలాంటి అవాంఛనీయ సంఘటనలు చోటుచేసుకోకుండా పటిష్టమైన పోలీసు బందోబస్తు ఏర్పాటు చేసినట్లు పేర్కొన్నారు.  కలెక్టర్ పర్యటనకు ముందుగా జిల్లా ఎన్నికల పరిశీలకురాలు సదా భార్గవి గూడూరులోని ఎస్వీ ఆర్ట్స్ కళాశాల కౌంటింగ్ కేంద్రాన్ని సందర్శించి ఓట్ల లెక్కింపు ప్రక్రియను పరిశీలించారు. కౌంటింగ్ నిర్వహణపై అధికారులతో సమీక్షించి పలు సూచనలు చేశారు.