పుర ఎన్నికలకు ఏర్పాట్లు పూర్తి
ఓటర్లు నిర్భయంగా ఓటును సద్వినియోగం చేసుకోండి
ఉదయం 7 గంటల నుండి సాయంత్రం 5 గంటల వరకు పోలింగ్
జిల్లా కలెక్టర్ సుమిత్ కుమార్
చిత్తూరు ప్రతినిధి, మేజర్ న్యూస్ : జిల్లా లోని చిత్తూరునగర పాలక, పలు మున్సిపాలిటీలకు సంబంధించి మేయర్, చైర్మన్, కార్పోరేటర్ల ఎన్నికలకు అన్ని ఏర్పాట్లు పూర్తి చేసామని, ఓటర్లు తమ ఓటును నిర్భయంగా వినియోగించుకోవాలని జిల్లా కలెక్టర్ సుమిత్ కుమార్ గాంధీ పేర్కొన్నారు. శనివారం నగరంలోని పివికేఎన్ ప్రభుత్వ డిగ్రీ కళాశాలలో
పోలింగ్ సిబ్బందికి ఏర్పాటు చేసిన పోలింగ్ పరికరాల పంపిణీని పరిశీలించారు. అధికారులను మంచి పలు వివరాలను అడిగి తెలుసుకున్నారు. ఈ సందర్భంగా కలెక్టర్ మాట్లాడుతూ సమస్యాత్మక, అత్యంత సమస్యాత్మక పోలింగ్ కేంద్రాలుగా గుర్తించడం జరిగిందని, ఆయా ప్రదేశాలలో అదనపు భద్రతా ఏర్పాటు చేశామన్నారు. ప్రతి పోలింగ్ స్టేషన్ లో ప్రిసైడింగ్ అధికారి, అదనపు ప్రిసైడింగ్ అధికారితో పాటు, ముగ్గురు ఇతర పోలింగ్ సిబ్బందిని, మైక్రో పరిశీలకులను నియమించామన్నారు. వీరికి పోలింగ్ ప్రక్రియపై ఇప్పటికే రెండు దఫాలుగా పోలింగ్ శిక్షణ అందించడం జరిగిందన్నారు. సంబంధిత ఎన్నికల సిబ్బందిని రూట్ అధికారుల ఆధ్వర్యంలో పోలింగ్ సామగ్రితో పాటు, వాహనాలలో ఆయా పోలింగ్ స్టేషన్లకు పంపడం జరిగిందన్నారు. ఆదివారం ఉదయం 7 గంటల నుండి సాయంత్రం 5 గంటల వరకు పోలింగ్ నిర్వహించడం జరుగుతుందని, ఉదయం 6 గంటలకే పోలింగ్ కేంద్రాన్ని పోలింగ్ నిమిత్తం సిద్ధం చేయడం జరుగుతుందన్నారు. ప్రజలు నిర్దేశించిన సమయంలోగా పోలింగ్ కేంద్రానికి చేరుకొని తమ ఓటు హక్కును వినియోగించుకోవాలని జిల్లా కలెక్టర్ ఓటర్లకు విజ్ఞప్తి చేశారు.
చిత్తూరు నగరపాలక పరిధిలో మేయర్, 9 కార్పొరేటర్ స్థానాలకు పోటీ
చిత్తూరు నగర పాలక సంస్థ పరిధిలో మొత్తం 60 డివిజన్లకు గాను 51 డివిజన్లు ఏకగ్రీవం కాగా... మిగిలిన 21, 22, 27, 31, 32, 42, 44, 46, 53 డివిజన్ల లో పోలింగ్ జరగనుంది. మేయర్ పదవికి ఆరుగురు పోటీలో ఉన్నారు. పోలింగ్ స్టేషన్ కు 200 మీటర్ల పరిధిలో అయిదుగురికి మించి జనం గుమికూడడం నిషేధించారు.చిత్తూరు నగర పరిధిలో 1,48,583 మంది ఓటర్లు ఉండగా, 175 పోలింగ్ కేంద్రాలు, 2, రూట్లు ఏర్పాటు చేయడం జరిగిందని మున్సిపల్ కమిషనర్ తెలిపారు. ఈ కార్యక్రమంలో చిత్తూరు నగర పాలక సంస్థ కమిషనర్ నరసింహప్రసాద్, అసిస్టెంట్ కలెక్టర్ వెంకటేష్, ఆర్వో పుల్లారెడ్డి, చిత్తూరు ఆర్డీవో శ్రీనివాసులు సంబంధిత అధికారులు తదితరులు పాల్గొన్నారు.
ఉమాశంకర్ చిత్తూరు స్టాఫ్ రిపోర్టర్.
