పరిసరాల పరిశుభ్రతకు ప్రజలు సహకరించాలి – డా. అనిల్ కుమార్.
చిత్తూరు అర్బన్, మేజర్ న్యూస్:
నగరంలోని ప్రజా మరుగుదొడ్లను పరిశుభ్రంగా ఉంచుకోవడం ప్రతి ఒక్కరి బాధ్యత అని నగరపాలక సంస్థ ఆరోగ్య అధికారి డా. అనిల్ కుమార్ పిలుపునిచ్చారు. ప్రజా మరుగుదొడ్లను సద్వినియోగం చేసుకోవడంతో పాటు వాటి పరిశుభ్రతను కాపాడేందుకు స్థానిక ప్రజలు సహకరించాలని సూచించారు.
గురువారం ప్రపంచ మరుగుదొడ్ల దినోత్సవాన్ని పురస్కరించుకొని నగరంలోని పలు ప్రాంతాల్లో ఉన్న ప్రజా మరుగుదొడ్లను ఆయన తనిఖీ చేశారు. ఈ సందర్భంగా మరుగుదొడ్ల నిర్వహణ, పరిశుభ్రతపై శానిటరీ ఇన్స్పెక్టర్లు, స్వర్ణ వార్డు పారిశుధ్య పర్యావరణ కార్యదర్శులు, మేస్త్రీలతో కలిసి ప్రజలకు అవగాహన కార్యక్రమాలు నిర్వహించారు. మరుగుదొడ్లను వినియోగించిన అనంతరం శుభ్రంగా ఉంచుకోవాలని, అపరిశుభ్రత వల్ల వ్యాధులు ప్రబలే ప్రమాదం ఉందని ప్రజలకు వివరించారు.అనంతరం న్యూ బాలాజీ కాలనీలో ఇంటింటి నుంచి చెత్త సేకరణపై ప్రత్యేక అవగాహన కార్యక్రమం చేపట్టారు. ప్రతి ఇంట్లో తడి చెత్త, పొడి చెత్తను వేర్వేరుగా విభజించి పారిశుధ్య కార్మికులకు అందించాలని సూచించారు. చెత్తను రోడ్లపై, బహిరంగ ప్రదేశాల్లో పడేయకుండా నగర పరిశుభ్రతకు ప్రతి ఒక్కరూ బాధ్యతగా వ్యవహరించాలని కోరారు.ఈ సందర్భంగా ఇంటింటి చెత్త సేకరణపై అవగాహన ర్యాలీ నిర్వహించారు. కార్యక్రమంలో శానిటరీ ఇన్స్పెక్టర్లు, స్వర్ణ వార్డు కార్యదర్శులు, పారిశుధ్య సిబ్బంది పాల్గొన్నారు.
చిత్తూరు అర్బన్ రిపోర్టర్, లవకుమార్