నాగాయలంకలో ఎన్నికల సామగ్రి పంపిణీని పరిశీలించిన కలెక్టర్ డీకే బాలాజీ

నాగాయలంక, మేజర్ న్యూస్: జిల్లాలో స్థానిక సంస్థల ఎన్నికలు–2026లో భాగంగా జడ్పీటీసీ, ఎంపీటీసీ ఎన్నికల నిర్వహణకు అవసరమైన ఏర్పాట్లు పూర్తి చేసినట్లు కృష్ణా జిల్లా కలెక్టర్ డీకే బాలాజీ తెలిపారు. బుధవారం నాగాయలంక మండలంలోని టీటీడీ కళ్యాణ మండపంలో ఏర్పాటు చేసిన ఎన్నికల సామగ్రి పంపిణీ కేంద్రాన్ని సందర్శించి పోలింగ్ సిబ్బందికి సామగ్రి పంపిణీ ప్రక్రియను పరిశీలించారు. జిల్లాలోని అన్ని మండల కేంద్రాల్లో పోలింగ్ బృందాలకు ఎన్నికల సామగ్రి పంపిణీ చేస్తున్నట్లు తెలిపారు. నాగాయలంక మండలంలో 45 పోలింగ్ కేంద్రాలకు సంబంధించిన సిబ్బంది సామగ్రిని స్వీకరించి, వాటిని సరిచూసుకుంటున్నారని, పరిశీలన అనంతరం సాయంత్రంలోగా కేటాయించిన పోలింగ్ కేంద్రాలకు చేరుకునేలా ఏర్పాట్లు చేసినట్లు వివరించారు. మండలంలోని కొన్ని గ్రామాలు లంక ప్రాంతాల్లో ఉండటంతో పోలింగ్ సిబ్బందిని, ఎన్నికల సామగ్రిని పడవల ద్వారా తరలించేందుకు ప్రత్యేక ఏర్పాట్లు చేస్తున్నట్లు తెలిపారు. పోలింగ్ ప్రక్రియకు ఎలాంటి ఆటంకాలు కలగకుండా అధికారులు సమన్వయంతో పనిచేయాలని సూచించారు. ప్రజాస్వామ్యంలో ఓటు అత్యంత శక్తివంతమైన ఆయుధమని, ప్రతి ఒక్కరూ తమ ఓటు హక్కును తప్పనిసరిగా వినియోగించుకుని ప్రజాస్వామ్య బలోపేతానికి తోడ్పడాలని కలెక్టర్ ప్రజలకు విజ్ఞప్తి చేశారు.

స్టాఫ్ రిపోర్టర్: ✍️ ప్రేమ్ రాజ్, అవనిగడ్డ నియోజకవర్గం, కృష్ణాజిల్లా.