ముస్లింల విద్యాభివృద్ధికి ఎంఐఎం కృషి - నాంపల్లి ఎమ్మెల్యే మాజీద్ హుస్సేన్

సూర్య - మానకొండూర్ : తెలంగాణ రాష్ట్రంలో ముస్లిం మైనారిటీల విద్యా ప్రమాణాలను మెరుగు పరిచేందుకు ఎంఐఎం పార్టీ విశేషంగా కృషి చేస్తోందని నాంపల్లి ఎమ్మెల్యే మాజీద్ హుస్సేన్ అన్నారు. ఎంఐఎం అధినేత, బారిష్టర్ అసదుద్దీన్ ఓవైసీ చేసిన ప్రత్యేక కృషితోనే రాష్ట్రంలో మైనారిటీ గురుకులాల అంకురార్పణ జరిగిందని ఆయన గుర్తుచేశారు. బుధవారం మండల కేంద్రమైన మానకొండూర్ ప్రభుత్వ ఉర్దూ మీడియం పాఠశాలలో పదో తరగతి విద్యార్థులకు 'సాలారే మిల్లత్ ఆల్ ఇన్ వన్ 2026' గైడ్లను ఉచితంగా పంపిణీ చేశారు. అలాగే 8, 9 తరగతుల విద్యార్థులకు నోట్ బుక్స్, పెన్నులను అందజేశారు. సిరిసిల్ల, గంభీరావుపేట, వేములవాడ ప్రాంతాల విద్యార్థులకు పంపిణీ చేసేందుకు వీలుగా ఆయా నియోజకవర్గాల పార్టీ ప్రతినిధులకు గైడ్లను అప్పగించారు.ఈ సందర్భంగా ఎమ్మెల్యే మాజీద్ హుస్సేన్ మాట్లాడుతూ.. విద్యార్థుల జీవితాల్లో పదో తరగతి వార్షిక పరీక్షలు అత్యంత కీలకమైనవని, ఇందులో ఉత్తీర్ణులు కావడానికి సాలారే మిల్లత్ గైడ్ ఎంతో దోహదపడుతుందని పేర్కొన్నారు. భవిష్యత్ తరాలకు ఉన్నత విద్యను అందించాలనే సంకల్పంతో మాజీ ఎంపీ, దివంగత సుల్తాన్ సలావుద్దీన్ ఓవైసీ 26 సంవత్సరాల క్రితం ఈ ఉచిత గైడ్ల పంపిణీని ప్రారంభించారని తెలిపారు. ఆయన ఆశయ సాధనలో భాగంగానే ప్రస్తుత పార్టీ అధినేత అసదుద్దీన్ ఒవైసీ, శాసనసభ పక్ష నేత అక్బరుద్దీన్ ఒవైసీలు తెలుగు రాష్ట్రాల్లో ఉర్దూ భాషను బ్రతికించడం కోసం, ఉర్దూ మీడియం పాఠశాలల బలోపేతానికి అమోఘమైన కృషి చేస్తున్నట్లు వెల్లడించారు.హైదరాబాద్ నగరవ్యాప్తంగా పేద ముస్లిం పిల్లల కోసం కార్పొరేట్ స్థాయిలో 20 పాఠశాలలను స్థాపించి, ప్రతి ఏటా 20 వేల మంది విద్యార్థులకు ఉచితంగా విద్యను అందిస్తున్న ఘనత తమ పార్టీ నాయకత్వానిదేనన్నారు. యువత చెడు వ్యసనాలకు దూరంగా ఉండి ఉన్నత చదువులు చదవాలని పిలుపునిచ్చారు.ఈ కార్యక్రమంలో ఎంఐఎం ఉమ్మడి కరీంనగర్ జిల్లా అధ్యక్షుడు సయ్యద్ గులాం అహ్మద్ హుస్సేన్,మానకొండూర్ మస్జిద్ మాజీ అధ్యక్షుడు సిరాజుద్దీన్ పాషా,పార్టీ నాయకులు హాఫిజ్ సయ్యద్ మొయిజుద్దీన్ ఖాద్రీ, అహ్మద్ మొహియుద్దీన్ బాబుజానీ, అబ్దుల్ గఫ్ఫార్, మెరాజోద్దీన్, అబ్దుల్లా ఖాన్, ఫసియుద్దీన్ ఖాలీద్, షాకిర్ నహ్ది, ఖమరొద్దీన్ షబ్బీర్, ఎజాజ్ ఖురేషీ, పాఠశాల ఉపాధ్యాయులు  విద్యార్థులు పాల్గొన్నారు.