రామాయణంపై వస్తున్న విమర్శలపై స్పందించిన నిర్మాత నమిత్ మల్హోత్రా.. హాలీవుడ్ స్థాయిలోనే అద్భుత దృశ్యకావ్యం
సూర్య ఎంటర్‌టైన్‌మెంట్ డెస్క్: భారతీయ చలనచిత్ర చరిత్రలో అత్యంత ప్రతిష్టాత్మకంగా తెరకెక్కుతున్న పౌరాణిక చిత్రం 'రామాయణం' గురించి ప్రస్తుతం సినీ వర్గాల్లో తీవ్ర చర్చ జరుగుతోంది. ఇప్పటికే మన దేశంలో ఎన్నో రామాయణ గాథలు, టీవీ సీరియల్స్ వచ్చినప్పుడు మళ్లీ ఈ కొత్త సినిమాను ఎందుకు తెరకెక్కిస్తున్నారనే ప్రశ్నలు కొందరి నుంచి వ్యక్తమవుతున్నట్లు ఈ చిత్ర నిర్మాత నమిత్ మల్హోత్రా స్పష్టం చేశారు. అయితే ఇంతకుముెన్నడూ చూడని రీతిలో సరికొత్త దృశ్య అద్భుతంగా, అత్యున్నత హంగులతో ఈ చిత్రాన్ని ప్రపంచ ప్రేక్షకుల ముందుకు తీసుకువెళ్తున్నట్లు ఆయన వెల్లడించారు.
నితీశ్ తివారీ దర్శకత్వంలో తెరకెక్కుతున్న ఈ భారీ బడ్జెట్ చిత్రానికి నమిత్ మల్హోత్రా నిర్మాతగా వ్యవహరిస్తున్నారు. హాలీవుడ్‌లో ప్రసిద్ధి చెందిన అవతార్, ది ఒడిస్సీ, అవెంజర్స్ వంటి భారీ విజువల్ వండర్ సినిమాల సరసన మన రామాయణాన్ని నిలబెట్టాలనేదే తమ ప్రధాన ఉద్దేశమని ఆయన తెలిపారు. ఇప్పటివరకు ఏ టెలివిజన్ షో లేదా వీధి నాటకం కూడా చూపించని విధంగా అత్యంత అద్భుతమైన విజువల్ ఎఫెక్ట్స్‌తో ఈ చిత్రాన్ని రూపొందిస్తున్నామని, ప్రేక్షకులు థియేటర్లలో ఈ విజువల్ స్పెక్టాకిల్‌ను చూసిన తర్వాత తమ ప్రయత్నం వెనుక ఉన్న అసలు కారణాన్ని అర్థం చేసుకుంటారని ఆయన ధీమా వ్యక్తం చేశారు.
అంతర్జాతీయ స్థాయిలో భారతీయ సినిమా సత్తాను చాటేలా హాలీవుడ్ స్థాయికి దీటుగా ఈ ప్రాజెక్ట్‌ను తీర్చిదిద్దుతున్నట్లు నమిత్ మల్హోత్రా తెలిపారు. ప్రపంచవ్యాప్తంగా ఉన్న ప్రేక్షకులను కట్టిపడేసేలా అసాధారణమైన సాంకేతికతను ఉపయోగిస్తున్నామని, హాలీవుడ్ మేకర్స్ ఏ విధంగా అయితే భారీ బడ్జెట్ సినిమాలను తెరకెక్కిస్తారో, అదే స్థాయిలో ఇండియన్ సినిమా కూడా అంతర్జాతీయ స్థాయిలో పోటీపడగలదని నిరూపించడమే తమ లక్ష్యమని పేర్కొన్నారు. విజువల్స్ పరంగా ఎక్కడా రాజీ పడకుండా అత్యున్నత ప్రమాణాలతో ఈ చిత్రాన్ని రూపొందిస్తున్నట్లు ఆయన వివరించారు.
ఈ చిత్రంలో రణ్‌బీర్ కపూర్ రాముడిగా, సాయి పల్లవి సీతగా నటిస్తుండగా, కన్నడ స్టార్ హీరో యశ్ రావణాసురుడి పాత్రలో కనిపించనున్నారు. ప్రపంచవ్యాప్తంగా మొదటి భాగం నవంబర్ 5, 2026న విడుదల కానుండగా, రెండో భాగం 2027 దీపావళికి ప్రేక్షకుల ముందుకు రానుంది. తెలుగు, హిందీ, తమిళ, కన్నడ, మలయాళ భాషలతో పాటు అంతర్జాతీయ స్థాయిలోనూ అత్యధిక స్క్రీన్లలో విడుదల కానున్న ఈ దృశ్యకావ్యం భారతీయ సినీ పరిశ్రమ రికార్డులన్నింటినీ తిరగరాస్తుందని సినీ విశ్లేషకులు భావిస్తున్నారు.
