ఎన్టీఆర్ జిల్లాలో కూటమి విజయదుందుభి.. ఎంపీ కేశినేని చిన్ని కార్యాలయంలో సంబరాలు
విజయవాడ, మేజర్ న్యూస్: ఎన్టీఆర్ జిల్లాలోని మున్సిపాలిటీలు, విజయవాడ నగరపాలక సంస్థ ఎన్నికల్లో తెలుగుదేశం, జనసేన, బీజేపీ కూటమి అభ్యర్థులు ఘన విజయం సాధించడంతో విజయవాడలో రాజకీయ సందడి నెలకొంది. విజయం సాధించిన అభ్యర్థులు, వారి అనుచరులు, కూటమి నాయకులు, కార్యకర్తలు పెద్ద సంఖ్యలో ఎంపీ కేశినేని శివనాథ్ (చిన్ని) కార్యాలయానికి తరలివచ్చారు. దీంతో కార్యాలయ ప్రాంగణం విజయోత్సాహంతో కళకళలాడింది.
ఈ సందర్భంగా ఎంపీ కేశినేని చిన్ని విజయం సాధించిన అభ్యర్థులను వ్యక్తిగతంగా కలిసి శుభాకాంక్షలు తెలిపి అభినందించారు. ప్రజలు తమపై ఉంచిన నమ్మకాన్ని నిలబెట్టుకుంటూ, ప్రజలకు అందుబాటులో ఉంటూ వారి సమస్యల పరిష్కారానికి కృషి చేయాలని సూచించారు.
కూటమి అభ్యర్థుల విజయానికి కృషి చేసిన నాయకులు, కార్యకర్తలను కూడా ఎంపీ అభినందించారు. నాయకుల సమన్వయం, కార్యకర్తల సమష్టి కృషితోనే ఈ విజయం సాధ్యమైందని పేర్కొన్నారు. ప్రజలు అందించిన విజయాన్ని బాధ్యతగా స్వీకరించి స్థానిక సంస్థలను అభివృద్ధి పథంలో నడిపించాలని ఆకాంక్షించారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.
