ఎన్నికల నిర్వహణకు పటిష్ట ఏర్పాట్లు పూర్తి: కలెక్టర్ హిమాన్షు శుక్ల

వెంకటాచలం ,మేజర్ న్యూస్  :     జిల్లాలో జెడ్పీటీసీ, ఎంపీటీసీ ఎన్నికల నిర్వహణకు అన్ని ఏర్పాట్లు పూర్తి చేసినట్లు జిల్లా కలెక్టర్ హిమాన్షు శుక్ల తెలిపారు. వెంకటాచలంలోని రిసెప్షన్, డిస్ట్రిబ్యూషన్ కేంద్రాలను పరిశీలించి ఎన్నికల సామగ్రి పంపిణీ ప్రక్రియను సమీక్షించారు. ఈ సందర్భంగా కలెక్టర్ మాట్లాడుతూ జిల్లాలోని 34 మండలాల పరిధిలో 1,568 పోలింగ్ కేంద్రాలను ఏర్పాటు చేసినట్లు తెలిపారు. పోలింగ్ కేంద్రాల్లో సీసీ కెమెరాలు, వెబ్ కెమెరాలను ఏర్పాటు చేసి ఎన్నికల ప్రక్రియను నిరంతరం పర్యవేక్షించనున్నట్లు వెల్లడించారు. ఎన్నికల విధుల్లో 11 వేల మంది సిబ్బందిని, భద్రత కోసం 3 వేల మంది పోలీసులను నియమించినట్లు పేర్కొన్నారు. సమస్యాత్మక పోలింగ్ కేంద్రాల వద్ద ప్రత్యేక పోలీసు బందోబస్తు ఏర్పాటు చేసినట్లు తెలిపారు.ఓటర్లు ఎలాంటి భయాందోళనలకు గురికాకుండా స్వచ్ఛందంగా తమ ఓటు హక్కును వినియోగించుకోవాలని కలెక్టర్ హిమాన్షు శుక్ల పిలుపునిచ్చారు.