ప్రతి ఒక్కరు ఓటు హక్కు వినియోగించుకోవాలి

శ్రీకాకుళం, సూర్య : జిల్లాలో గురువారం జరగనున్న జడ్పీటీసీ, ఎంపీటీసీ సాధారణ ఎన్నికల్లో గ్రామీణ ఓటర్లంతా ఉత్సాహంగా పాల్గొని తమ ఓటు హక్కును వినియోగించుకోవాలని జిల్లా కలెక్టర్, జిల్లా ఎన్నికల అధికారి స్వప్నిల్ దినకర్ పుండ్కర్ పిలుపునిచ్చారు. ప్రస్తుతం జిల్లాలో అక్కడక్కడ వర్షాలు కురుస్తున్నందున ఓటర్లు ఇబ్బంది పడకుండా ప్రతి పోలింగ్ కేంద్రం వద్ద ప్రత్యేక ఏర్పాట్లు చేసినట్లు తెలిపారు. బ్యాలెట్ పెట్టెలు తడవకుండా పటిష్ఠ రక్షణ చర్యలు చేపట్టామన్నారు. వయోవృద్ధులు, దివ్యాంగులకు ప్రత్యేక సదుపాయాలు ఉంటాయని, ప్రజలంతా ప్రశాంత వాతావరణంలో తమ విలువైన ఓటును నమోదు చేసి స్థానిక సంస్థల బలోపేతానికి తోడ్పడాలని కలెక్టర్ కోరారు. ఉదయం 7:00 గంటల నుంచి సాయంత్రం 5:00 గంటల వరకు పోలింగ్ జరుగుతుందని, ఓటర్లంతా సమయపాలన పాటిస్తూ తమ ఓటు హక్కును వినియోగించుకోవాలని విజ్ఞప్తి చేశారు. జిల్లావ్యాప్తంగా ఏర్పాటు చేసిన 2,004 పోలింగ్ కేంద్రాల వద్ద ఓటర్లకు ఎలాంటి అసౌకర్యం కలగకుండా ప్రత్యేక చర్యలు చేపట్టినట్లు కలెక్టర్ వెల్లడించారు.

పకడ్బందీ నిఘా.. మూడంచెల భద్రత: ఎన్నికలను నిష్పాక్షికంగా, శాంతియుతంగా నిర్వహించేందుకు జిల్లావ్యాప్తంగా పటిష్ఠ పోలీసు బందోబస్తు ఏర్పాటు చేసినట్లు కలెక్టర్ స్పష్టం చేశారు. సమస్యాత్మక, అత్యంత సమస్యాత్మక కేంద్రాల్లో ప్రత్యేక బలగాలను మోహరించడంతో పాటు 757 కేంద్రాల్లో వెబ్‌కాస్టింగ్‌ ద్వారా కమాండ్ కంట్రోల్ రూమ్ నుంచి ప్రత్యక్షంగా పర్యవేక్షిస్తున్నామన్నారు. ఎవరైనా ఓటర్లను ప్రలోభపెట్టేందుకు యత్నించినా, బూత్‌ల వద్ద శాంతిభద్రతలకు విఘాతం కలిగించినా చట్టపరంగా కఠిన చర్యలు తీసుకుంటామని హెచ్చరించారు. ప్రశాంత వాతావరణంలో ఎన్నికలు ముగిసేందుకు అన్ని రాజకీయ పక్షాలు, అభ్యర్థులు, ముఖ్యంగా గ్రామీణ ఓటర్లు బాధ్యతాయుతంగా సహకరించాలని కలెక్టర్ కోరారు.