అవయవ మార్పిడిలో నెల్లూరు అపోలో సరికొత్త రికార్డు: ఒకే నెలలో 8 శస్త్రచికిత్సలు, అరుదైన ఘనతలు

నెల్లూరు,  కల్చరల్,  మేజర్ న్యూస్  :   నెల్లూరు అపోలో స్పెషాలిటీ హాస్పిటల్స్ అవయవ మార్పిడి చికిత్సల్లో విశేష ప్రతిభ కనబరిచి ప్రాంతీయ వైద్యరంగంలో సరికొత్త మైలురాళ్లను అధిగమించింది. అక్టోబర్ నెలలోనే రికార్డు స్థాయిలో 6 కిడ్నీ మార్పిడి, 2 కాలేయ మార్పిడి శస్త్రచికిత్సలను వైద్య బృందం విజయవంతంగా పూర్తి చేసింది. ఇందులో భాగంగా నెల్లూరులోనే తొలిసారిగా బ్రెయిన్ డెడ్ అయిన దాత నుంచి సేకరించిన కాలేయాన్ని విజయవంతంగా అమర్చడమే కాకుండా, రాయలసీమ ప్రాంతంలోనే మొదటిసారిగా ఒకే రోగికి కాలేయం, కిడ్నీ రెండింటినీ మార్పిడి చేసే అత్యంత సంక్లిష్టమైన బహుళ అవయవ మార్పిడిని చేపట్టి అరుదైన మైలురాయిని నమోదు చేసింది.
ఆసుపత్రిలో ఏర్పాటు చేసిన విలేకరుల సమావేశంలో మెడికల్ సర్వీసెస్ డైరెక్టర్ డాక్టర్ శ్రీరామ్ సతీష్, ప్రముఖ నెఫ్రాలజిస్ట్ డాక్టర్ ఏ.కె.చక్రవర్తి, యూనిట్ హెడ్ విశ్వేశ్వర్ రెడ్డి తదితరులు ఈ విజయానికి సంబంధించిన వివరాలను వెల్లడించారు. నెఫ్రాలజీ, యూరాలజీ, లివర్ ట్రాన్స్‌ప్లాంట్, అనస్థీషియా, క్రిటికల్ కేర్, నర్సింగ్ విభాగాల సమష్టి సమన్వయంతోనే శస్త్రచికిత్స అనంతర సంరక్షణతో కూడిన ఈ సంక్లిష్ట ప్రక్రియలు సాధ్యమయ్యాయని వారు పేర్కొన్నారు.