లోక్ అదాలత్తో సత్వర న్యాయం..
- సివిల్ కేసులు రాజీపడితే కోర్టు ఫీజు వాపసు
- జూనియర్ సివిల్ జడ్జి రోషిణి
కోటబొమ్మాళి, నవంబరు 18, మేజర్ న్యూస్: డిసెంబరు 12వ తేదీన స్థానిక జూనియర్ సివిల్ కోర్టులో నిర్వహించనున్న జాతీయ లోక్ అదాలత్తో సత్వర న్యాయం చేకూరుతుందని, కక్షిదారులు సద్వినియోగం చేసుకోవాలని జూనియర్ సివిల్ జడ్జి ఎం. రోషిణి పిలుపునిచ్చారు. బుధవారం కోటబొమ్మాళి జూనియర్ సివిల్ కోర్టు ఆవరణలో స్థానిక న్యాయవాదులు, కోటబొమ్మాళి, సంతబొమ్మాళి, నౌపడ పోలీస్ సిబ్బందితో పాటు బ్యాంకు అధికారులతో ఆమె వేర్వేరుగా సమన్వయ సమావేశాలు నిర్వహించారు. ఈ సందర్భంగా జడ్జి రోషిణి మాట్లాడుతూ, లోక్ అదాలత్లో ఇరుపార్టీల పరస్పర అంగీకారంతో సివిల్ కేసులు పరిష్కారమైతే కక్షిదారులు చెల్లించిన కోర్టు ఫీజును పూర్తిగా వాపసు ఇవ్వడం జరుగుతుందని స్పష్టం చేశారు.
రాజీకి అనుకూలమైన అన్ని రకాల క్రిమినల్, సివిల్ కేసులతో పాటు ప్రీ-లిటిగేషన్ కేసులను కూడా సామరస్యపూర్వకంగా పరిష్కరించుకోవచ్చని ఆమె సూచించారు. లోక్ అదాలత్లో వెలువడే తీర్పే అంతిమ తీర్పు అని, దీనికి ఎటువంటి అప్పీలు ఉండదని, తద్వారా కక్షిదారులకు సమయం, డబ్బు ఆదా అవుతాయని వివరించారు. ఈ సమావేశాల్లో స్థానిక న్యాయవాదుల సంఘం అధ్యక్షుడు లఖినేని శ్రీనివాసులు, ఏజీపీ పల్లి వాసుదేవరావు, పలువురు న్యాయవాదులు, పోలీసు అధికారులు, కోర్టు సిబ్బంది పాల్గొన్నారు.