స్పందన బాధిత కుటుంబానికి అందిన రేషన్!
వార్త ప్రచురితమైన వెంటనే స్పందించిన తహసీల్దార్
. హేమసుందర్రావు ఆదేశాలతో కదిలిన రెవెన్యూ యంత్రాంగం
. వారం రోజుల నిరీక్షణకు తెర.. బాధిత కుటుంబానికి ఊరట!
సంతబొమ్మాళి, నవంబర్ 18, మేజర్ న్యూస్ :
ప్రభుత్వ జాబితాలో పేరు ఉన్నప్పటికీ వారం రోజులుగా రేషన్ సరుకుల కోసం ఎదురుచూస్తున్న నిరుపేద మత్స్యకార కుటుంబానికి ఎట్టకేలకు న్యాయం జరిగింది. ఈ సమస్యపై బుధవారం 'సూర్య దినపత్రిక లో ప్రచురితమైన 'జాబితాలో పేరున్నా.. చేతికి అందని సాయం!' కథనానికి అధికారులు తక్షణమే స్పందించారు.
మండలంలోని మేఘవరం పంచాయతీ పరిధి యంపల్లవానిపేట గ్రామానికి చెందిన యంపల్ల చిన్నారావు, దేవి దంపతులకు మురసు తుపాను నేపథ్యంలో ప్రభుత్వం ప్రకటించిన ఉచిత బియ్యం, నిత్యావసర సరుకుల పంపిణీ జాబితాలో పేరు ఉన్నప్పటికీ సరుకులు అందకపోవడంతో తీవ్ర ఇబ్బందులు ఎదుర్కొంటున్న విషయాన్ని సూర్య దినపత్రిక వెలుగులోకి తీసుకొచ్చింది.
ఈ కథనంపై సంతబొమ్మాళి తహసీల్దార్ హేమసుందర్రావు వెంటనే స్పందించారు. బాధిత కుటుంబానికి తక్షణమే రేషన్ సరుకులు అందించాలని సంబంధిత సిబ్బందికి, రేషన్ డీలర్కు ఆదేశాలు జారీ చేశారు. తహసీల్దార్ ఆదేశాల మేరకు బుధవారమే బాధిత కుటుంబానికి రేషన్ సరుకులు అందజేశారు.
వారం రోజులుగా రేషన్ డిపో చుట్టూ తిరిగినా పట్టించుకోని సమస్య.. ఒక్క వార్తతో పరిష్కారం కావడంతో బాధిత కుటుంబం ఊరట చెందింది. తమ సమస్యను వెలుగులోకి తీసుకొచ్చి న్యాయం జరిగేలా చేసిన సూర్య దినపత్రికకు బాధితులు కృతజ్ఞతలు తెలిపారు.
ప్రజా సమస్యలను వెలుగులోకి తీసుకొస్తే అధికార యంత్రాంగం స్పందించి పరిష్కారం చూపుతుందనేందుకు ఈ ఘటన మరో నిదర్శనంగా నిలిచింది.