వరాహ నది బాధిత కుటుంబాలకు హోంమంత్రి అనిత పరామర్శ
ఒక్కో కుటుంబానికి రూ.లక్ష చొప్పున 3 లక్షలు సొంత నిధుల ఆర్థిక సాయం
ఎస్.రాయవరం, నవంబర్ 18, మేజర్ న్యూస్:
ఎస్.రాయవరం మండలం పెనుగొల్లు గ్రామ సమీపంలోని వరాహ నదిలో మూడు రోజుల క్రితం ముగ్గురు యువకులు మృతి చెందిన విషాద ఘటనపై రాష్ట్ర హోంమంత్రి వంగలపూడి అనిత తీవ్ర దిగ్భ్రాంతి వ్యక్తం చేశారు. ఈ నేపథ్యంలో బుధవారం పెనుగొల్లు గ్రామానికి స్వయంగా వెళ్లిన హోంమంత్రి మృతుల కుటుంబ సభ్యులను పరామర్శించి తన ప్రగాఢ సానుభూతిని తెలియజేశారు.
వరాహ నదిలో గల్లంతై మృతి చెందిన కాతేటి రిషి (18), ముప్పిడి వంశీ (20), కోడి గణేశ్ (20) చిత్రపటాలకు పూలమాలలు వేసి ఘనంగా నివాళులర్పించారు. అనంతరం కుటుంబ సభ్యులను ఓదార్చి, వారికి ధైర్యం చెప్పారు.యువకులు ప్రాణాలు కోల్పోవడం అత్యంత బాధాకరమని మంత్రి ఆవేదన వ్యక్తం చేశారు. బాధిత కుటుంబాలు ప్రభుత్వం అన్ని విధాలా అండగా ఉంటుందని హోంమంత్రి భరోసా ఇచ్చారు. ఒక్కొక్క కుటుంబానికి రూ.లక్ష చొప్పున తన సొంత నిధుల నుంచి మొత్తం రూ.3 లక్షల ఆర్థిక సహాయాన్ని అందజేశారు. ఈ కార్యక్రమంలో మంత్రి వెంట పార్టీ ఎస్ రాయవరం మండలఅధ్యక్షులు అమలకంటి అబద్దం, పార్టీ శ్రేణులు వున్నారు.