కొప్పర్రులో ప్రాథమిక ఆరోగ్య కేంద్రం ఏర్పాటు చేయాలి - సిపిఎం

నరసాపురం రూరల్, మేజర్ న్యూస్:మండలంలోనికొప్పర్రు గ్రామంలో ప్రాథమిక ఆరోగ్య కేంద్రాన్ని ఏర్పాటు చేయాలని కోరుతూ సిపిఎం ఆధ్వర్యంలో గ్రామస్తులు శుక్రవారం కొప్పర్రు సెంటర్‌లో నిరసన కార్యక్రమం చేశారు.ఈ సందర్భంగా సిపిఎం జిల్లా కార్యదర్శి వర్గ సభ్యులు కౌరు పెద్దిరాజు మాట్లాడుతూ కొప్పర్రు గ్రామాన్ని ఆనుకొని సుమారు 35 వేల జనాభా కలిగిన 9 గ్రామాల ప్రజలు ప్రభుత్వ వైద్య సేవల కోసం 10 కిలోమీటర్ల దూరం వెళ్లవలసి వస్తుందని ఆవేదన వ్యక్తం చేశారు. పది వేల జనాభాకు ఒక ఆసుపత్రి అవసరం ఉందని, అయితే 35 వేల జనాభా గల ప్రాంతంలో కనీసం ప్రాథమిక వైద్య కేంద్రం లేకపోవడం దారుణమని విమర్శించారు.ప్రభుత్వ వైద్య కేంద్రం అందుబాటులో లేకపోవడం వల్ల ప్రధానంగా గర్భిణీ స్త్రీలు, బాలింతలు, వృద్ధులు తీవ్ర ఇబ్బందులు పడవలసి వస్తుందని అన్నారు.కొప్పర్రు, సమీప గ్రామాల్లో అత్యధిక మంది దళితులు, బలహీన వర్గాల నిరుపేద ప్రజలు నివాసం ఉంటున్నారని, వీరికి వైద్య సేవలు అందుబాటులోకి తేవడం ప్రభుత్వ బాధ్యత అని తెలిపారు. తక్షణం కొప్పర్రులో ప్రాథమిక ఆరోగ్య కేంద్రం ఏర్పాటు చేయడానికి ప్రజా ప్రతినిధులు, అధికారులు తగిన చర్యలు చేపట్టాలని విజ్ఞప్తి చేశారు.ఈ కార్యక్రమంలో సిపిఎం మండల కార్యదర్శి జల్లి రామ్మోహన్ రావు, పిల్లి కామేశ్వరరావు, పోలిశెట్టి పేరంటాల నాయుడు, చినమిల్లి వీరబాబు, పోలిశెట్టి సత్తిబాబు, కోర బుల్లయ్య, తామరాడ పార్వతీశం, మోపిదేవి శేషయ్య, వర్దనపు జయరాజు తదితరులు పాల్గొన్నారు.

 రిపోర్ట్ ఇజ్రాయిల్  నరసాపురం పశ్చిమగోదావరి జిల్లా