కారు సీటు కింద రూ.8.98 కోట్ల విలువైన బంగారం.. ఇద్దరు అరెస్ట్!

విశాఖపట్నం: భారీగా అక్రమంగా తరలిస్తున్న విదేశీ బంగారాన్ని డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు స్వాధీనం చేసుకున్నారు. కోల్‌కతా నుంచి హైదరాబాద్‌కు వెళ్తున్న ఓ కారులో సీటు కింద దాచిన 5,832.90 గ్రాముల విదేశీ బంగారం అధికారుల తనిఖీల్లో బయటపడింది.

మార్కెట్ విలువ ప్రకారం ఈ బంగారం విలువ సుమారు రూ.8.98 కోట్లు ఉంటుందని అధికారులు గుర్తించారు. బంగారాన్ని అక్రమంగా తరలిస్తున్నట్లు అనుమానించిన డీఆర్ఐ అధికారులు కారును వెంబడించి పట్టుకున్నారు.కారును పరిశీలించిన అధికారులు సీటు కింద దాచిన బంగారాన్ని గుర్తించి స్వాధీనం చేసుకున్నారు. ఈ వ్యవహారానికి సంబంధించి ఇద్దరిని అరెస్ట్ చేసిన అధికారులు, వారిని జ్యుడిషియల్ కస్టడీకి తరలించారు.

కోల్‌కతా నుంచి హైదరాబాద్‌కు బంగారం ఎలా తరలిస్తున్నారు? దీని వెనుక మరెవరైనా ఉన్నారా? అనే కోణంలో దర్యాప్తు కొనసాగుతున్నట్లు సమాచారం.భారీ మొత్తంలో విదేశీ బంగారం పట్టుబడటంతో ఈ ఘటన చర్చనీయాంశంగా మారింది.