కార్తీక దీపారాధన భక్తులకు గొట్టిపాటి యూత్ అండ.. గుండ్లకమ్మ మార్గం సుగమం

సూర్య న్యూస్ అద్దంకి. 

పవిత్ర కార్తీక మాసం సందర్భంగా భక్తుల సౌకర్యార్థం అద్దంకి నర్రావారిపాలెం 'గొట్టిపాటి యూత్' సభ్యులు అభినందనీయమైన సేవా కార్యక్రమాన్ని చేపట్టారు. నర్రావారిపాలెం నుండి గుండ్లకమ్మ నదికి వెళ్లే రహదారిని గత నాలుగు రోజులుగా జేసీబీ (JCB) మరియు ట్రాక్టర్ల సహాయంతో రాళ్లు, చెత్తాచెదారం తొలగించి పూర్తిగా చదును చేయించారు. అలాగే, తెల్లవారుజామున మరియు రాత్రి వేళల్లో నదికి వెళ్లే భక్తులకు ఎలాంటి ఇబ్బందులు కలగకుండా రహదారి పొడవునా విద్యుత్ దీపాలను ఏర్పాటు చేశారు. మాల ధరించిన అయ్యప్ప స్వాములు, భవాని స్వాములు, శివ స్వాములతో పాటు కార్తీక దీపాలు వెలిగించేందుకు నదికి వచ్చే భక్తులందరూ ఈ బాగుచేసిన రహదారిని, లైటింగ్ సదుపాయాన్ని సద్వినియోగం చేసుకోవాలని గొట్టిపాటి యూత్ సభ్యులు కోరారు. యువత చేపట్టిన ఈ సేవా కార్యక్రమంపై స్థానిక భక్తులు, గ్రామస్తులు హర్షం వ్యక్తం చేస్తూ అభినందనలు తెలుపుతున్నారు.