జనావాసాల మధ్య ఇటుక బట్టీలను నిలిపివెయ్యాలి.. సిపిఐ

ఎమ్మిగనూరు, సూర్య ప్రతినిధి

పట్టణంలోని ఎల్లమ్మ బీడు కాలనీ సమీపంలో ఏర్పాటు చేయనున్న ఇటుక బట్టీని తక్షణమే నిలిపివేసి ప్రజల ఆరోగ్యాన్ని కాపాడాలని సీపీఐ పట్టణ కార్యదర్శి జి. రంగన్న డిమాండ్ చేశారు. ఆదివారం కాలనీ ప్రజలతో కలిసి ఇటుక బట్టీ ఏర్పాటును ఆయన పరిశీలించారు.
ఈ సందర్భంగా రంగన్న, భాస్కర్ యాదవ్ మాట్లాడుతూ, జనావాసాలకు సుమారు 50 మీటర్ల దూరంలో ఇటుక బట్టీ ఏర్పాటు చేయడం వల్ల పొగ, దుమ్ము, కాలుష్యంతో చిన్నపిల్లలు, వృద్ధులు, మహిళల ఆరోగ్యానికి ముప్పు వాటిల్లే ప్రమాదం ఉందని ఆందోళన వ్యక్తం చేశారు. ప్రజారోగ్యం, పర్యావరణ పరిరక్షణను దృష్టిలో ఉంచుకుని అధికారులు అనుమతులపై పునఃపరిశీలన చేయాలని కోరారు.
జిల్లా అధికారులు, మున్సిపల్ అధికారులు, కాలుష్య నియంత్రణ మండలి స్పందించి ఇటుక బట్టీ ఏర్పాటును నిలిపివేయాలని విజ్ఞప్తి చేశారు. లేనిపక్షంలో కాలనీ ప్రజలతో కలిసి ప్రజాస్వామ్య పద్ధతిలో ఆందోళన చేపడతామని హెచ్చరించారు.
ఈ కార్యక్రమంలో సీపీఐ నాయకులు బజారి, నరసింహులు, నాగరాజు, రాజు, మధు, గజేంద్ర, ఎల్లప్ప తదితరులు, కాలనీ ప్రజలు పాల్గొన్నారు.