జడ్పీటీసీ ఎన్నికల్లో కూటమి అభ్యర్థికే నా మద్దతు

భోగాపురం, సూర్య :  భోగాపురం మండల జడ్పీటీసీ ఎన్నికల్లో జనసేన పార్టీ తరఫున నామినేషన్ దాఖలు చేసినప్పటికీ, అనివార్య కారణాల వల్ల నామినేషన్‌ను ఉపసంహరించు కోలేకపోయానని జనసేన పార్టీ సీనియర్ నాయకుడు, వ్యాపారవేత్త చెల్లుబోయిన నర్సింగరావు తెలిపారు. గురువారం సాయంత్రం కొత్త మరడపాలెంలోని తన నివాసం వద్ద నిర్వహించిన పాత్రికేయుల సమావేశంలో ఆయన మాట్లాడారు. పార్టీ అధినేత పవన్‌ కల్యాణ్‌, ఎమ్మెల్యే లోకం నాగ మాధవి ఆదేశాల మేరకు కూటమి బలపరిచిన జడ్పీటీసీ అభ్యర్థి కర్రోతు చంద్రకళకు సంపూర్ణ మద్దతు ఇస్తున్నట్లు ప్రకటించారు. ఎన్నికల అధికారులు తనకు ఎయిర్ కండిసనర్ (ఏసి)‌ గుర్తును కేటాయించారని, అయితే ఓటర్లు ఆ గుర్తును పట్టించుకోకుండా కూటమి అభ్యర్థి కర్రోతు చంద్రకళకు ఓటు వేసి గెలిపించాలని విజ్ఞప్తి చేశారు. నామినేషన్‌ ఉపసంహరణ సాధ్యం కాకపోవడంతో ఓటర్లు ఎలాంటి గందరగోళానికి గురికావద్దని కోరారు. అలాగే భోగాపురం మండల ఎంపీపీ అభ్యర్థిగా కూటమి తరఫున బలపరిచిన మట్టా ఇందుమతికి కూడా తన సంపూర్ణ మద్దతు ఉంటుందని స్పష్టం చేశారు. మండల ప్రజలు ఈ విషయాన్ని గమనించి కూటమి బలపరిచిన అభ్యర్థుల విజయానికి సహకరించాలని నర్సింగరావు కోరారు.