గ్రామీణ ప్రాంతాల్లో నిరంతరాయంగా 24 గంటల విద్యుత్ పంపిణీ చేయడమే కూటమి ప్రభుత్వ లక్ష్యం -- ఎమ్మెల్యే చింతమనేని ప్రభాకర్

పెదవేగి, మేజర్ న్యూస్:పెదవేగి మండలం దుగ్గిరాల గ్రామ పంచాయతీ పరిధిలోని చుట్టుగుంట గ్రామంలో సుమారు రూ. 25 లక్షల వ్యయంతో నూతనంగా ఏర్పాటు చేసిన 24 గంటల నిరంతర త్రీ-ఫేస్ విద్యుత్ సరఫరాను  చింతమనేని ప్రభాకర్  శుక్రవారం లాంఛనంగా ప్రారంభించారు. ఈ సందర్భంగా గ్రామానికి విచ్చేసిన ఎమ్మెల్యే కి మహిళలు, గ్రామస్తులు ఆత్మీయ స్వాగతం పలికారు. అనంతరం విద్యుత్ ట్రాన్స్‌ఫార్మర్ వద్ద పూజలు నిర్వహించి స్విచ్ఛాన్ చేసి ప్రారంభించారు. ఈ సందర్భంగా ఆయన  మాట్లాడుతూ కూటమి ప్రభుత్వంలో గ్రామీణ ప్రాంతాలకు నిరంతరాయంగా నాణ్యమైన విద్యుత్ అందించడమే లక్ష్యమని, గతంలో లో-వోల్టేజీతో ఇబ్బందులు పడ్డ ప్రజలకు ఇకపై పూర్తి ఊరట లభిస్తుందని స్పష్టం చేశారు.అనంతరం గ్రామంలోని వీధుల్లో ఎమ్మెల్యే చింతమనేని కాలినడకన పర్యటించి ప్రజల సమస్యలను స్వయంగా అడిగి తెలుసుకున్నారు. నిలిచిపోయిన అండర్‌గ్రౌండ్ డ్రైనేజీ, సిమెంట్ రోడ్ల పనులను 15 నుంచి 20 రోజుల్లోపు ప్రారంభించి వేగంగా పూర్తి చేయాలని ఇంజనీరింగ్, పంచాయతీ అధికారులను ఆదేశించారు. పర్యటనలో భాగంగా స్థానిక అంగన్వాడీ కేంద్రాన్ని ఆకస్మికంగా తనిఖీ చేసిన ఎమ్మెల్యే చింతమనేని చిన్నారులతో ముచ్చటించి వారికి అందిస్తున్న గుడ్లు, పాలు, పౌష్టికాహార నాణ్యతను పరిశీలించి కేంద్రంలో మౌలిక వసతులు మరింత మెరుగుపరచాలని అధికారులకు సూచించారు. ఈ కార్యక్రమంలో జిల్లా విద్యుత్ శాఖ పర్యవేక్షక ఇంజనీర్ అంబేద్కర్, పెదవేగి మండల పార్టీ అధ్యక్షులు ఈడుపుగంటి అనిల్, దుగ్గిరాల మాజీ ఉపసర్పంచ్ చింతమనేని చిన్న గోపి, సీనియర్ నాయకులు చింతమనేని సతీష్ సహా పలువురు అధికారులు, పంచాయతీ సిబ్బంది, కూటమి నాయకులు , గ్రామస్తులు పాల్గొన్నారు.

 న్యూస్ బ్యూరో కే బాలసౌరి ఏలూరు