గ్రామాభివృద్ధే లక్ష్యంగా రేఖ మంజునాథ్ ఇంటింటి ప్రచారం
కాడేపల్లి వినాయక స్వామి ఆలయం వద్ద పూజలు.. గ్రామంలో ఇంటింటి ప్రచారం
గుడుపల్లి మేజర్ న్యూస్:-
మండలంలోని గుడుపల్లి గ్రామపంచాయతీ సర్పంచ్ అభ్యర్థిగా పోటీ చేస్తున్న రేఖ మంజునాథ్ ఆదివారం ఎన్నికల ప్రచారాన్ని ప్రారంభించారు. కాడేపల్లి గ్రామంలోని వినాయక స్వామి ఆలయంలో ప్రత్యేక పూజలు నిర్వహించి, తనకు కేటాయించిన మంచం గుర్తుతో ప్రచారానికి శ్రీకారం చుట్టారు. అనంతరం కాడేపల్లి గ్రామంలో ఇంటింటికీ తిరుగుతూ ప్రజలను కలుసుకుని వారి సమస్యలను తెలుసుకున్నారు.ఈ సందర్భంగా రేఖ మంజునాథ్ మాట్లాడుతూ.. తనకు అవకాశం కల్పిస్తే గ్రామంలో తాగునీరు, రహదారులు, మురుగునీటి కాలువలు, వీధి దీపాలు, పారిశుద్ధ్య సమస్యల పరిష్కారానికి కృషి చేస్తానన్నారు. మహిళలు, వృద్ధులు, పేదలకు ప్రభుత్వ సంక్షేమ పథకాలు అందేలా చొరవ తీసుకుంటానని, ప్రజలకు ఎల్లప్పుడూ అందుబాటులో ఉంటూ గ్రామాభివృద్ధికి కృషి చేస్తానని తెలిపారు. తన మంచం గుర్తుపై ప్రజలు మద్దతు తెలిపి ఆశీర్వదించాలని కోరారు.
ఈ కార్యక్రమంలో కుప్పం నియోజకవర్గ సమన్వయ కమిటీ కన్వీనర్ భవాని చంద్రశేఖర్, మండల అధ్యక్షులు సుబ్రహ్మణ్యం, ఎంపీపీ మీనాక్షి హేమాంబర్ గౌడ్, అమరేష్ ,మాజీ సర్పంచ్ వెంకటేష్, వెంకటేష్, పలువురు ముఖ్య నాయకులు కార్యకర్తలు, యువత పాల్గొన్నారు.