ఘనంగా ఉద్యమకారుల దినోత్సవం
ఎడ్యుకేషన్ స్టాఫ్ రిపోర్టర్ : జాతీయ గ్రంథాలయ వారోత్సవాలలో భాగంగా తిరుపతిలోని ప్రథమ శ్రేణి శాఖ గ్రంథాలయంలో గ్రంథాలయ ఉద్యమకారుల దినోత్సవం అత్యంత ఘనంగా నిర్వహించారు.గ్రంథాలయాధికారి ఎం.ధనంజయులు ఆధ్వర్యంలో జరిగిన ఈ కార్యక్రమానికి నడ్డి నారాయణ అధ్యక్షత వహించగా ప్రభుత్వ పాలిటెక్నిక్ కళాశాల సీనియర్ లైబ్రేరియన్ నటరాజన్ నాయుడు ముఖ్య అతిథిగా పాల్గొన్నారు. ఈ సందర్భంగా ప్రముఖ గ్రంథాలయ ఉద్యమ పితామహులు గాడిచర్ల హరిసర్వోత్తమ రావు, అయ్యంకి వెంకటరమణయ్య చిత్రపటాలకు అతిథులు పూలమాలలు వేసి ఘనంగా నివాళులర్పించారు. ఈ సందర్భంగా ఏర్పాటుచేసిన సభలో వక్తలు మాట్లాడుతూ గ్రంథాలయాలు కేవలం పుస్తక భాండాగారాలు మాత్రమే కాదని, అవి సమాజ చైతన్యానికి, విజ్ఞాన వికాసానికి ప్రజా విశ్వవిద్యాలయాలుగా పనిచేస్తాయని పేర్కొన్నారు. గ్రంథాలయ ఉద్యమకారుల త్యాగాలను నేటి తరం స్ఫూర్తిగా తీసుకుని పఠనాసక్తిని పెంపొందించుకోవాలని పిలుపునిచ్చారు. ఈ కార్యక్రమంలో విశిష్ట అతిథులుగా రిటైర్డ్ అసిస్టెంట్ ఇంగ్లీష్ ప్రొఫెసర్ డాక్టర్ గోపాల్, సామాజిక కార్యకర్త మునిలక్ష్మి, చంద్రగిరి ప్రభుత్వ పాలిటెక్నిక్ కళాశాల జూనియర్ లైబ్రేరియన్ మోహన్, జనవిజ్ఞాన వేదిక ప్రతినిధి రెడ్డప్ప, సినీ రచయిత గౌస్ బాషా పాల్గొని ప్రసంగించారు. కార్యక్రమంలో గ్రంథాలయ సిబ్బంది, పాఠకులు, విద్యార్థులు పెద్ద సంఖ్యలో పాల్గొన్నారు.
సీఎం గౌడ్ తిరుపతి స్టాఫ్ రిపోర్టర్