విద్యార్థుల భద్రతే లక్ష్యం.. -జిల్లాలోని పలు పాఠశాలలలో శక్తి బృందం అవగాహన
ఎడ్యుకేషన్ స్టాఫ్ రిపోర్టర్ : విద్యార్థుల భద్రత, బాలల హక్కుల పరిరక్షణే లక్ష్యంగా జిల్లాలోని పలు పాఠశాలల్లో శక్తి బృందం ఆధ్వర్యంలో అవగాహన కార్యక్రమాలు నిర్వహిస్తున్నారు. కార్యక్రమంలో భాగంగా జిల్లా ఎస్పీ ఎల్.సుబ్బరాయుడు ఆదేశాల మేరకు సోమవారం శక్తి బృందం చెర్లోపల్లిలోని జెడ్.పి.ఉన్నత పాఠశాల, సి.మల్లవరం, ఎం.పి.పి. పాఠశాల విద్యార్థులకు గుడ్ టచ్-బ్యాడ్ టచ్, బాల కార్మిక వ్యవస్థ, బాలలపై వేధింపులు, బాలల అదృశ్యం, కిడ్నాప్ వంటి అంశాలపై అవగాహన కల్పించారు. అలాగే క్రమశిక్షణ, నైతిక విలువలు, మంచి అలవాట్లు, వ్యక్తిత్వ వికాసం, విద్య ప్రాముఖ్యతపై వివరించారు. తమకు ఎదురయ్యే సమస్యలను భయపడకుండా తల్లిదండ్రులు, ఉపాధ్యాయులు లేదా పోలీసుల దృష్టికి తీసుకురావాలని తెలిపారు.పోలీసుల టోల్ ఫ్రీ నంబర్ 112, బాలల రక్షణ కోసం చైల్డ్ హెల్ప్ లైన్ 1098తో పాటు పోలీస్ అత్యవసర సేవల నంబర్ల గురించి వివరించారు. బాలల్లో చిన్న వయస్సు నుంచే ఆత్మవిశ్వాసం, అప్రమత్తత పెంపొందించడమే ఈ కార్యక్రమాల లక్ష్యమని శక్తి బృందం సభ్యులు పేర్కొన్నారు.
సీఎం గౌడ్ తిరుపతి స్టాప్ రిపోర్టర్