ఘనంగా జవహర్‌లాల్ నెహ్రూ జయంతి వేడుకలు
పాములపాడు: మేజర్ న్యూస్ 59వ జాతీయ గ్రంథాలయ వారోత్సవాలను పురస్కరించుకుని నవంబర్ 14న బాలల దినోత్సవం సందర్భంగా పాములపాడు శాఖా గ్రంథాలయంలో భారతదేశ తొలి ప్రధానమంత్రి పండిట్ జవహర్‌లాల్ నెహ్రూ జయంతి వేడుకలను ఘనంగా నిర్వహించారు.
ఈ కార్యక్రమానికి ముఖ్య అతిథిగా విచ్చేసిన పాములపాడు ప్రాథమిక ఆరోగ్య కేంద్రం వైద్యాధికారిణి శ్రీమతి ఈ.వి. నాగలక్ష్మీ దేవి నెహ్రూ చిత్రపటానికి పూలమాల వేసి ఘనంగా నివాళులర్పించారు.
ఈ సందర్భంగా ఆమె మాట్లాడుతూ గ్రంథాలయాలు విజ్ఞాన భాండాగారాలని, విద్యార్థులు, యువత గ్రంథాలయాలను సద్వినియోగం చేసుకొని జ్ఞానాన్ని పెంపొందించుకోవాలని సూచించారు. పుస్తక పఠనం ద్వారా విజ్ఞానంతో పాటు వ్యక్తిత్వ వికాసం కూడా సాధ్యమవుతుందని తెలిపారు.
ఈ కార్యక్రమంలో పాఠకులు రవీంద్ర యాదవ్, పరమేష్, నాగేశ్వరరావు, చంద్రుడు, యతిరాజు తదితరులతో పాటు విద్యార్థినీ విద్యార్థులు పాల్గొన్నారు. ఈ వివరాలను గ్రంథాలయాధికారి సి.వి. కృష్ణారెడ్డి తెలిపారు.
