ఎఫ్‌ఏఏ దేశవ్యాప్త విమానాల నిలిపివేత తర్వాత విమానాశ్రయాల్లో అస్తవ్యస్త పరిస్థితులు
సూర్య అంతర్జాతీయ డెస్క్: అమెరికాలో ఫెడరల్ ఏవియేషన్ అడ్మినిస్ట్రేషన్ (FAA) దేశవ్యాప్తంగా విమానాల రాకపోకలను అకస్మాత్తుగా నిలిపివేయడంతో ఎయిర్‌పోర్టుల్లో తీవ్ర గందరగోళం నెలకొంది. ఎయిర్ ట్రాఫిక్ కంట్రోల్ (ATC) వ్యవస్థలో తలెత్తిన తీవ్రమైన కమ్యూనికేషన్ సమస్యలు మరియు రేడియో, రాడార్ అంతరాయాల కారణంగా అమెరికా చరిత్రలోనే అరుదైన రీతిలో దేశవ్యాప్త గ్రౌండ్ స్టాప్ (విమానాల నిలిపివేత) విధించారు. ఈ అనూహ్య పరిణామంతో దేశవ్యాప్తంగా వేలాది విమానాలు నిలిచిపోగా, విమానాశ్రయాల్లో ప్రయాణికులు తీవ్ర ఇబ్బందులను ఎదుర్కొన్నారు.
సుమారు నాలుగు గంటలకు పైగా కొనసాగిన ఈ అత్యవసర నిలిపివేత కారణంగా ప్రయాణీకుల షెడ్యూల్స్ తలక్రిందులయ్యాయి. వందలాది విమానాలు రద్దు కావడంతో పాటు వేలాది విమానాలు గంటల తరబడి ఆలస్యంగా నడిచాయి. విమానాశ్రయాల్లో బోర్డింగ్ పాస్‌ల కోసం క్యూ కట్టిన ప్రయాణికులు తీవ్ర నిరాశకు గురయ్యారు. కొద్ది గంటల తర్వాత ఎఫ్‌ఏఏ వ్యవస్థలను పునరుద్ధరించి ఎయిర్‌స్పేస్‌ను తిరిగి తెరిచినప్పటికీ, విమానాలు సాధారణ స్థితికి రావడానికి సమయం పడుతుందని, ప్రయాణికులు తమ విమాన స్థితిని ఎప్పటికప్పుడు సరిచూసుకోవాలని అధికారులు సూచించారు.
