ఎంపీడీవో కార్యాలయ ఆవరణలో పేరుకుపోయిన చెత్త
వెల్దుర్తి, మేజర్ న్యూస్: వెల్దుర్తి మండల పరిషత్ అభివృద్ధి అధికారి (ఎంపీడీవో) కార్యాలయ ఆవరణ చెత్తాచెదారంతో అపరిశుభ్రంగా మారింది. కార్యాలయ పరిసరాల్లో ఎక్కడికక్కడ ప్లాస్టిక్ వ్యర్థాలు, కాగితాలు, ఇతర చెత్త కుప్పలుగా పేరుకుపోవడంతో దుర్వాసన వెదజల్లుతోంది.రోజూ వివిధ పనుల నిమిత్తం మండలంలోని పలు గ్రామాల నుంచి ప్రజలు, ప్రజాప్రతినిధులు ఈ కార్యాలయానికి వస్తుంటారు. అయితే కార్యాలయ ఆవరణలోనే ఇలా వ్యర్థాలు పేరుకుపోవడంపై స్థానికులు అసహనం వ్యక్తం చేస్తున్నారు. పారిశుద్ధ్య నిర్వహణను అధికారులు గాలికి వదిలేశారన్న విమర్శలు వినిపిస్తున్నాయి. ఉన్నతాధికారులు స్పందించి కార్యాలయ ఆవరణలో చెత్తను తొలగించి, పరిశుభ్రంగా ఉంచాలని ప్రజలు కోరుతున్నారు.