ఎమ్మెల్యే కోళ్ల లలితకుమారితో రాజ్యసభ సభ్యులు చింతకాయల విజయ్ భేటీ

​ఎస్.కోట, సూర్య : తెలుగుదేశం పార్టీ సీనియర్ నాయకులు, రాజ్యసభ సభ్యులు చింతకాయల విజయ్ ఎల్.కోటలోని ఎమ్మెల్యే క్యాంప్ కార్యాలయానికి విచ్చేశారు. రానున్న స్థానిక సంస్థల ఎన్నికల నేపథ్యంలో విజయనగరం జిల్లా ఎన్నికల పరిశీలకులుగా నియమితులైన ఆయన, నియోజకవర్గ తాజా రాజకీయ పరిస్థితులు, క్షేత్రస్థాయి సమీకరణాలపై స్థానిక శాసనసభ్యురాలు కోళ్ల లలిత కుమారితో విస్తృతంగా చర్చించారు. కార్యాలయానికి చేరుకున్న విజయ్‌కు ఎమ్మెల్యే, కూటమి నేతలు, కార్యకర్తలు ఘనంగా స్వాగతం పలికారు.
​ఈ సందర్భంగా ఎస్.కోట నియోజకవర్గంలోని స్థానిక సంస్థల రిజర్వేషన్ల అంశం, వార్డులు/పంచాయతీల వారీగా బలాల సమీకరణపై ఇరువురు నేతలు లోతుగా సమాలోచనలు జరిపారు. ఎన్నికల్లో అనుసరించాల్సిన వ్యూహాలు, కూటమి భాగస్వామ్య పార్టీలైన టీడీపీ, జనసేన, బీజేపీల మధ్య క్షేత్రస్థాయి సమన్వయం మరింత బలోపేతం కావడంపై ప్రధానంగా చర్చించారు. కూటమి నేతలు, కార్యకర్తలు అంతా కలిసికట్టుగా పనిచేసి, స్థానిక సంస్థల ఎన్నికల్లో తిరుగులేని విజయం సాధించేలా ప్రణాళికలు రూపొందించాలని నిర్ణయించారు. ​రాబోయే రోజుల్లో ప్రతి గ్రామంలో ప్రజలకు ప్రభుత్వ అభివృద్ధి, సంక్షేమ కార్యక్రమాలను వివరిస్తూ ఎన్నికలకు సన్నద్ధం కావాలని నాయకులు పిలుపునిచ్చారు. ఈ కార్యక్రమంలో పలువురు కూటమి ముఖ్య నాయకులు, స్థానిక ప్రజాప్రతినిధులు, కార్యకర్తలు పాల్గొన్నారు.

రిపోర్టర్ : గోవింద్, ఎల్ కోట,  విజయనగరం జిల్లా.