telanagana
బాసర మూల నక్షత్రం వేడుకలకు 200 మంది పోలీసులతో పటిష్ట భద్రత
సూర్య నిర్మల్ ప్రతినిధి.నిర్మల్ జిల్లా బాసరలోని శ్రీ జ్ఞాన సరస్వతి అమ్మవారి ఆలయంలో రేపు జరగనున్న మూల నక్షత్రం మహా అక్షరాభ్యాస కార్యక్రమానికి భారీ సంఖ్యలో భక్తులు తరలివచ్చే అవకాశం ఉన్నందున, భక్తుల భద్రత దృష్ట్యా జిల్లా పోలీస్ శాఖ విస్తృత బందోబస్తు ఏర్పాట్లు చేపట్టింది. ఈ నేపథ్యంలో జిల్లా ఎస్పీ డా. జి. జానకి షర్మిల, ఆధ్వర్యంలో బాసరలోని ఎం.కె. కన్వెన్షన్ హాల్‌లో బందోబస్తు విధులకు హాజరైన సుమారు 200 మంది పోలీసు అధికారులు, సిబ్బందికి విధుల నిర్వహణపై బ్రీఫింగ్ కార్యక్రమం నిర్వహించారు.ఈ సందర్భంగా విధుల్లో అప్రమత్తంగా ఉండాలని, భక్తులతో మర్యాదపూర్వకంగా వ్యవహరిస్తూ వారికి అవసరమైన సహాయ సహకారాలు అందించాలని సూచించారు. ఆలయ పరిసరాల్లో రద్దీ నియంత్రణ, ట్రాఫిక్ నిర్వహణ, గోదావరి నది స్నాన ఘట్టాల వద్ద భద్రత, నది ప్రవాహ ఉధృతి పర్యవేక్షణపై ప్రత్యేక దృష్టి సారించాలని ఆదేశించారు. ప్రతి పోలీసు సిబ్బంది తమకు కేటాయించిన విధులను బాధ్యతాయుతంగా నిర్వహిస్తూ, సమన్వయంతో పనిచేయాలని సూచించారు.
భక్తులకు పోలీస్ శాఖ సూచనలు:
- పోలీసు అధికారులు, సిబ్బంది ఇచ్చే సూచనలు తప్పనిసరిగా పాటించాలి.
- ఆలయ పరిసరాల్లో క్రమశిక్షణ పాటిస్తూ, తోపులాటకు దూరంగా ఉండాలి.
- గోదావరి నది స్నాన ఘట్టాల వద్ద అప్రమత్తంగా ఉండాలి. నీటి ప్రవాహ ఉధృతి ఎక్కువగా ఉన్న ప్రాంతాల్లోకి వెళ్లకూడదు.
- చిన్నారులను ఎల్లప్పుడూ తమ వెంటనే ఉంచుకోవాలి. పిల్లలు తప్పిపోతే వెంటనే సమీప పోలీసు సిబ్బందిని సంప్రదించాలి.
- వాహనాలను సూచించిన పార్కింగ్ ప్రదేశాల్లోనే నిలపాలి. ట్రాఫిక్‌కు అంతరాయం కలిగించకూడదు.
- అనుమానాస్పద వ్యక్తులు లేదా వస్తువులు కనిపిస్తే వెంటనే పోలీసులకు సమాచారం అందించాలి.
- అత్యవసర పరిస్థితుల్లో సమీపంలోని పోలీసు సిబ్బంది సహాయం తీసుకోవాలి.
మూల నక్షత్రం మహా అక్షరాభ్యాస కార్యక్రమాన్ని ప్రశాంతంగా, సురక్షితంగా నిర్వహించేందుకు పోలీస్ శాఖ అన్ని చర్యలు చేపట్టింది. భక్తులు పోలీసులకు సహకరించి, సురక్షితంగా అమ్మవారిని దర్శించుకొని తమ చిన్నారులకు అక్షరాభ్యాసం చేయించుకోవాలని జిల్లా పోలీస్ శాఖ విజ్ఞప్తి చేసింది.ఈ కార్యక్రమంలో జిల్లా ఎస్పీ డా. జి. జానకి షర్మిలతో పాటు అదనపు ఎస్పీ ఉపేందర్ రెడ్డి, భైంసా ఏఎస్పీ సాయి కిరణ్, సీఐలు, ఆర్‌ఐలు, ఎస్‌ఐలు, ఆర్‌ఎస్‌ఐలు మరియు పోలీసు సిబ్బంది పాల్గొన్నారు.
