ఎన్నికల వేళ ఎక్సైజ్ శాఖ నిఘా: తనిఖీలు, పాత నేరస్తులకు హెచ్చరికలు.

​కావలి మేజర్ న్యూస్ :    ఆంధ్రప్రదేశ్‌లో త్వరలో జరగనున్న మున్సిపల్, కార్పొరేషన్, జెడ్పీటీసీ/ఎంపీటీసీ మరియు పంచాయతీ ఎన్నికల నేపథ్యంలో ఎన్నికల ప్రవర్తనా నియమావళి అమలులోకి రావడంతో ప్రొహిబిషన్ & ఎక్సైజ్ శాఖ విస్తృత తనిఖీలు చేపట్టింది.  ​ఉన్నతాధికారుల ఆదేశాల మేరకు నెల్లూరు అసిస్టెంట్ ఎక్సైజ్ సూపరింటెండెంట్ (ఎన్ఫోర్స్మెంట్) కె.శ్రీనివాసరావు ఆధ్వర్యంలో ఎన్ఫోర్స్మెంట్ మరియు కావలి ఎక్సైజ్ స్టేషన్ సిబ్బంది సంయుక్తంగా ఈ తనిఖీలు నిర్వహించారు.  ​పాత నేరస్తులకు హెచ్చరిక: బోగోలు, కప్పరాళ్లతిప్ప గ్రామాల్లో నాటుసారా తయారీ, విక్రయాలు చేసే పాత నేరస్తులతో అధికారులు సమావేశం నిర్వహించారు. ఎన్నికల కోడ్ అమలులో ఉన్నందున ఎలాంటి అక్రమ నాటుసారా తయారీ, విక్రయాలకు పాల్పడవద్దని ఖరాకండిగా హెచ్చరించారు.  ​బోగోలు సమీపంలోని గంగతిప్ప, కప్పరాళ్లతిప్ప సమీపంలోని నక్కలగుంట అటవీ ప్రాంతాలలో అధికారులు సమగ్రంగా గాలించారు.  ​వాహనాల తనిఖీ: ముసునూరు టోల్ ప్లాజా వద్ద జాతీయ రహదారి-16 పై ఎక్సైజ్ సిబ్బంది వాహనాలను తనిఖీ చేశారు. గంజాయి, సుంకం చెల్లించని మద్యం మరియు ఇతర మాదకద్రవ్యాల రవాణాను అడ్డుకట్ట వేసేందుకు ఈ సోదాలు చేపట్టారు.  ​ఈ దాడుల్లో నెల్లూరు ఎన్ఫోర్స్మెంట్ ఎస్ఐ, హెడ్ కానిస్టేబుళ్లు, కానిస్టేబుళ్లతో పాటు కావలి ఎక్సైజ్ స్టేషన్ సిబ్బంది పాల్గొన్నారు. స్థానికంగా అక్రమ మద్యం, మాదకద్రవ్యాల నిరోధానికి కఠిన చర్యలు తీసుకుంటున్నట్లు కావలి ప్రొహిబిషన్ & ఎక్సైజ్ ఇన్స్పెక్టర్ బి. వెంకటరావు తెలిపారు.