27 ఏళ్ల వివాహ బంధం.. అరుదైన ఫొటోలతో మాధురి దీక్షిత్ దంపతుల వెడ్డింగ్ యానివర్సరీ వేడుక!
సూర్య ఎంటర్‌టైన్‌మెంట్ డెస్క్: బాలీవుడ్ నిత్య సౌందర్య తార మాధురి దీక్షిత్ మరియు భర్త డాక్టర్ శ్రీరామ్ నేనే తమ వివాహ వార్షికోత్సవాన్ని అత్యంత ఆనందంగా జరుపుకున్నారు. వీరి వివాహం జరిగి 27 సంవత్సరాలు పూర్తయిన సందర్భంగా ఈ దంపతులు తమ పెళ్లి నాటి అరుదైన జ్ఞాపకాలను సోషల్ మీడియా వేదికగా అభిమానులతో పంచుకున్నారు. అమెరికాలోని బెవెర్లీ హిల్స్‌లో జరిగిన తమ వివాహ వేడుకకు సంబంధించిన ఫోటోలను షేర్ చేస్తూ వారు రాసుకున్న భావోద్వేగపు మాటలు ప్రస్తుతం నెట్టింట వైరల్ అవుతున్నాయి.
ఇరవై ఏడేళ్ల క్రితం బెవెర్లీ హిల్స్ కోర్టులో తాము ఒక్కటయ్యామని, ఆ సమయంలో జీవితం తమను తీసుకువెళ్తుందో తెలియకపోయినా కలసికట్టుగా ప్రయాణించాలనే నిర్ణయంతోనే అడుగులు వేసామని శ్రీరామ్ నేనే తెలిపారు. ఇద్దరు అద్భుతమైన కుమారులు, ఎన్నో మధురమైన జ్ఞాపకాలు, జీవితంలో ఎదురైన కొన్ని సవాళ్లను అధిగమిస్తూ సాగిన ఈ ప్రయాణంలో తిరిగి మళ్లీ నిన్నే ఎంచుకుంటానంటూ ఆయన తన సతీమణిపై ప్రేమను చాటుకున్నారు. ఈ సుందరమైన ప్రయాణంలో తమకు అండగా నిలిచిన ప్రతి ఒక్కరికీ కృతజ్ఞతలు తెలుపుతూ భవిష్యత్తులోనూ ఇదే ప్రేమను కొనసాగిస్తామని పేర్కొన్నారు.
అమెరికాలో కార్డియోవాస్కులర్ సర్జన్‌గా స్థిరపడిన శ్రీరామ్ నేనేను ప్రేమ వివాహం చేసుకున్న మాధురి దీక్షిత్, పెళ్లి తర్వాత కొంతకాలం సినిమాలకు దూరంగా ఉన్నారు. ఆ తర్వాత కుటుంబ బాధ్యతలతో పాటు కుమారుల పెంపకంపై దృష్టి పెట్టిన ఆమె, ఆ తరువాత మళ్లీ రీఎంట్రీ ఇచ్చి తన సెకండ్ ఇన్నింగ్స్‌లోనూ అదరగొడుతున్నారు. కేవలం సినిమాలే కాకుండా టెలివిజన్ షోలు మరియు డిజిటల్ మాధ్యమాలలోనూ వివిధ కార్యక్రమాలకు వ్యాఖ్యాతగా వ్యవహరిస్తూ ఎప్పుడూ ప్రేక్షకులతో టచ్‌లో ఉంటున్నారు.
తాము జరుపుకున్న ఈ వివాహ వార్షికోత్సవ వేడుకకు సంబంధించిన చిత్రాలు సోషల్ మీడియాలో ప్రత్యక్షం కావడంతో అభిమానులు, సినీ ప్రముఖులు ఈ జంటకు పెద్ద ఎత్తున శుభాకాంక్షలు తెలియజేస్తున్నారు. వెండితెరపైనే కాకుండా రియల్ లైఫ్‌లోనూ అన్యోన్య దంపతులుగా పేరు తెచ్చుకున్న ఈ జోడీ ఇప్పటికీ యువతరానికి ఆదర్శంగా నిలుస్తోందని సినీ విశ్లేషకులు ప్రశంసిస్తున్నారు. ఇన్నాళ్ల వైవాహిక జీవితంలోనూ ఏనాడూ వివాదాలకు తావివ్వకుండా అన్యోన్యంగా ఉంటున్న ఈ దంపతుల అరుదైన ఫొటోలు ప్రస్తుతం ఇంటర్నెట్‌లో హాట్ టాపిక్‌గా మారాయి.
Also Read: 'రణబాలి' చిత్రంలో జయమ్మగా యాంకర్ సుమ.. వైరల్ అవుతున్న ప్రత్యేక లుక్
