telanagana
ఎల్లంపేట్ మున్సిపాలిటీలో ఘనంగా బతుకమ్మ వేడుకలు
మేడ్చల్, మేజర్ న్యూస్:తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలను ఎల్లంపేట్ మున్సిపాలిటీ ఆధ్వర్యంలో ఘనంగా నిర్వహించారు. తెలంగాణ ఆడపడుచుల ఆత్మీయతకు, ప్రకృతి ప్రేమకు, పూల పండుగ వైభవానికి ప్రతిబింబంగా నిలిచే బతుకమ్మ సంబరాలు మహిళల్లో ఉత్సాహాన్ని నింపాయి. రంగురంగుల పూలతో బతుకమ్మలను అందంగా అలంకరించి, సంప్రదాయ బతుకమ్మ పాటలు పాడుతూ మహిళలు వేడుకల్లో పాల్గొన్నారు.తెలంగాణ ప్రత్యేకతను ప్రపంచానికి చాటిచెప్పే బతుకమ్మ పండుగను సంప్రదాయబద్ధంగా నిర్వహించడం ద్వారా మన సంస్కృతి, వారసత్వాన్ని భావితరాలకు అందించాల్సిన అవసరాన్ని ఈ వేడుకలు గుర్తుచేశాయి. మహిళలు పెద్ద సంఖ్యలో పాల్గొని బతుకమ్మల చుట్టూ చేరి పాటలు పాడుతూ సందడి చేయడంతో పండుగ వాతావరణం నెలకొంది.ఈ కార్యక్రమంలో ఎల్లంపేట్ మున్సిపల్ చైర్‌పర్సన్ లావుడ్యా శ్రీదేవి రమేష్, వైస్ చైర్‌పర్సన్ మేకల రజిత దేవేందర్ రెడ్డి, మున్సిపల్ కమిషనర్ కృష్ణారెడ్డి, కౌన్సిలర్లు అర్చన శ్రీనివాస్, శ్రీలత రమేష్, శారదా రాజు నాయక్, మహేశ్వరి రాజేష్, సురేష్ రెడ్డి, భాస్కర్, బందెల కుమార్, నునావత్ శాంతి, రాజు నాయక్ తదితరులు ప్రజాప్రతినిధులు, మున్సిపల్ అధికారులు, సిబ్బంది, మహిళా సంఘాల సభ్యులు, పట్టణ ప్రముఖులు పాల్గొన్నారు.
