ఏకగ్రీవంగా ఆంధ్రప్రదేశ్ ఫుట్‌బాల్ అసోసియేషన్ నూతన కార్యవర్గం అధ్యక్షుడిగా కోటగిరి శ్రీధర్.. జనరల్ సెక్రటరీగా ఎం. డేనియల్ ప్రదీప్

కామవరపుకోట , సూర్య న్యూస్:ఆంధ్రప్రదేశ్ ఫుట్‌బాల్ అసోసియేషన్ నూతన కార్యవర్గం ఏకగ్రీవంగా ఎన్నికైంది. ఏలూరు జిల్లా కామవరపుకోట మండలం ఈస్ట్ ఎడవల్లిలోని శ్రీ సీతారామచంద్ర స్వామి కల్యాణ మండపంలో ఆదివారం అసోసియేషన్ (రిజి. నెం. 963/2019) ఎన్నికలు నిర్వహించారు. గత నెల 14న జారీ చేసిన ఎన్నికల నోటిఫికేషన్ ప్రకారం జరిగిన ఈ ఎన్నికల్లో నూతన కార్యవర్గాన్ని ఏకగ్రీవంగా ఎన్నుకున్నారు.

అధ్యక్షుడిగా కోటగిరి శ్రీధర్

ఎన్నికల రిటర్నింగ్ అధికారి, విశ్రాంత న్యాయమూర్తి జస్టిస్ జి. శ్యామ్ ప్రసాద్ ఎన్నికల ఫలితాలను ప్రకటించారు. అధ్యక్షుడిగా కోటగిరి శ్రీధర్, ఉపాధ్యక్షులు-1గా గుత్తికొండ వంశీ కిరణ్, ఉపాధ్యక్షులు-2గా టంగుటూరు రాధికా రెడ్డి, ఉపాధ్యక్షులు-3గా జె.వి. అనిల్ కుమార్, కోశాధికారిగా ఏలేశ్వరపు నీలాద్రి వెంకట కుమార్ ఎన్నికయ్యారు.

కార్యనిర్వాహక సభ్యులుగా కె. క్రాంతి కుమార్, జి.ఎస్.ఎస్. పవన్ కుమార్, ఎం. అచ్యుతాంబ, జి. సరిత, ఎం.వి.ఎస్. సాయి కుమార్, బాపనపల్లి ఉమా శంకర్, ఎ. రెడ్డప్ప, ఎం. అంజలీ దేవి, బి. చక్రవర్తి, డి. మౌనిక ఎన్నికయ్యారు.

పరిశీలకుల సమక్షంలో ఎన్నికలు

ఎన్నికల ప్రక్రియను పరిశీలించేందుకు ఆల్ ఇండియా ఫుట్‌బాల్ ఫెడరేషన్ (AIFF) తరఫున స్వేన్ హరేంద్ర, ఆంధ్రప్రదేశ్ రాష్ట్ర ఒలింపిక్ అసోసియేషన్ తరఫున బడేటి వెంకట్రామయ్య పరిశీలకులుగా హాజరయ్యారు. వారి సమక్షంలో ఎన్నికల ప్రక్రియ నిర్వహించారు.

జనరల్ సెక్రటరీగా ఎం. డేనియల్ ప్రదీప్

ఎన్నికల అనంతరం నిర్వహించిన జనరల్ బాడీ సమావేశంలో ఎం. డేనియల్ ప్రదీప్‌ను జనరల్ సెక్రటరీగా ఎన్నుకున్నారు. ఈ సందర్భంగా రాష్ట్రంలో ఫుట్‌బాల్ క్రీడ అభివృద్ధి, క్రీడాకారులకు మెరుగైన అవకాశాలు కల్పించడం, ప్రతిభావంతులైన యువ క్రీడాకారులను గుర్తించడం వంటి అంశాలపై చర్చించారు.

రాష్ట్రంలో ఫుట్‌బాల్ అభివృద్ధే లక్ష్యం: కోటగిరి శ్రీధర్

మీడియా సమావేశంలో నూతన అధ్యక్షుడు కోటగిరి శ్రీధర్ మాట్లాడుతూ, ఆంధ్రప్రదేశ్‌లో ఫుట్‌బాల్ క్రీడను మరింత అభివృద్ధి చేయడమే నూతన కార్యవర్గం ప్రధాన లక్ష్యమని తెలిపారు. రాష్ట్రంలోని పట్టణాలు, గ్రామాల్లో దాగి ఉన్న క్రీడా ప్రతిభను వెలికితీసి, యువ క్రీడాకారులకు తగిన అవకాశాలు కల్పించేందుకు కృషి చేస్తామని చెప్పారు.

క్షేత్రస్థాయి నుంచి ఫుట్‌బాల్ క్రీడను బలోపేతం చేస్తూ, మరింత మంది యువతను ఈ క్రీడ వైపు ఆకర్షించేందుకు ప్రణాళికాబద్ధంగా ముందుకు సాగుతామని పేర్కొన్నారు. రాష్ట్ర క్రీడాకారులు ఉన్నత స్థాయిలో రాణించేలా అవసరమైన శిక్షణ, ప్రోత్సాహం, అవకాశాలు కల్పించడంపై ప్రత్యేక దృష్టి సారిస్తామని కోటగిరి శ్రీధర్ వెల్లడించారు.ఈ కార్యక్రమంలో వంటిపల్లి వెంకటేశ్వరరావు,క్రాంతి కిరణ్,బడేటి  రామయ్య, చక్రవర్తి,అనిల్,వంశీ,గణేష్, రానా ,రాధిక రెడ్డి,శేషు, కొత్తపల్లి అనిల్,రాజశేఖర్, తదితరులు పాల్గొని నూతన కార్యవర్గానికి శుభాకాంక్షలు తెలియజేశారు.

 పసుమర్తి రాము జిల్లా ఇన్చార్జి ఏలూరు,