డిజిటల్ విధానంలో ఎరువుల విక్రయాలు – ఎఫ్‌ఎఫ్‌ఎస్‌ యాప్‌పై అవగాహన కార్యక్రమం*
పాలకొల్లు సూర్య న్యూస్ రైతులకు ఎరువుల విక్రయాలను మరింత పారదర్శకంగా, సులభతరంగా నిర్వహించేందుకు కేంద్ర ప్రభుత్వం నూతనంగా ప్రవేశపెట్టిన ఎఫ్‌ఎఫ్‌ఎస్‌ (ఫ్రేమ్‌వర్క్‌ ఫర్‌ ఫెర్టిలైజర్‌ సేల్‌) యాప్‌ ద్వారా ఎరువుల విక్రయాలు చేపట్టాలని జిల్లా వ్యవసాయ అధికారి గెడ్డం సునీత సూచించారు. శుక్రవారం పాలకొల్లులోని ఛాంబర్‌ ఆఫ్‌ కామర్స్‌లో ఎరువుల డీలర్లు, సహకార సంఘాల సిబ్బందికి డిజిటల్ విధానంలో ఎరువుల కొనుగోలు ప్రక్రియపై అవగాహన కార్యక్రమం నిర్వహించారు. భీమవరం నుంచి ముఖ్య అతిథిగా హాజరైన జిల్లా వ్యవసాయ అధికారి సునీత మాట్లాడుతూ, కేంద్ర ప్రభుత్వ ఆదేశాల మేరకు ఎఫ్‌ఎఫ్‌ఎస్‌ యాప్‌, ఈ-పాస్‌ యంత్రాల ద్వారా రైతులకు ఎరువుల విక్రయాలు జరపాల్సి ఉంటుందని వివరించారు. నూతన విధానంపై ఎరువుల డీలర్లు, సహకార సంఘాల సిబ్బంది పూర్తి అవగాహన కలిగి ఉండాలని సూచించారు.ఈ సందర్భంగా పాలకొల్లు సహాయ వ్యవసాయ సంచాలకులు (ఆర్) పి. మురళీకృష్ణ మాట్లాడుతూ, ఎఫ్‌ఎఫ్‌ఎస్‌ యాప్‌ ద్వారా రైతులు తమకు అవసరమైన ఎరువులను స్వయంగా ముందుగా నమోదు చేసుకుని, తమకు నచ్చిన ఎరువుల డీలర్‌ వద్దకు వెళ్లి బుక్‌ చేసుకున్న క్యూఆర్‌ కోడ్‌ను చూపించి ఎరువులు కొనుగోలు చేయవచ్చని తెలిపారు. డిజిటల్ విధానం ద్వారా ఎరువుల కొనుగోలు ప్రక్రియను సులభతరం చేయడంతోపాటు విక్రయాల్లో పారదర్శకత పెంపొందించేందుకు అవకాశం ఉంటుందని వివరించారు.ఈ కార్యక్రమంలో పాలకొల్లు, పోడూరు, ఆచంట మండలాల వ్యవసాయ అధికారులు కె. రాజశేఖర్‌, ఎం. విశ్వాసరావు, బి. నాగరాజు, మూడు మండలాలకు చెందిన ఎరువుల డీలర్లు, సహకార సంఘాల కార్యదర్శులు పాల్గొన్నారు.
రిపోర్టర్ నరసింహారావు పాలకొల్లు పశ్చిమగోదావరి జిల్లా
