చంద్రగిరి ఎంపీపీగా సరితా రమణమూర్తి, వైస్ ఎంపీపీగా కె సునీల్ ఎన్నిక: 14 మంది టీడీపీ ఎంపీటీసీల ప్రమాణ స్వీకారం.. ఇద్దరు వైసీపీ సభ్యుల గైర్హాజరు!
చంద్రగిరి, మేజర్ న్యూస్
తిరుపతి జిల్లా, చంద్రగిరి మండల పరిషత్ (ఎంపీపీ) నూతన పాలకవర్గ ప్రమాణ స్వీకార మహోత్సవం మరియు ఎన్నికల ప్రక్రియ అత్యంత ఘనంగా, ప్రశాంత వాతావరణంలో జరిగింది. మండల పరిధిలో మొత్తం 16 మంది ఎంపీటీసీ సభ్యులు ఉండగా, ఈ కార్యక్రమానికి 14 మంది తెలుగుదేశం పార్టీ ఎంపీటీసీ సభ్యులు హాజరయ్యారు. మిగిలిన ఇద్దరు వైసీపీ ఎంపీటీసీ సభ్యులు ఈ సమావేశానికి గైర్హాజరయ్యారు.
- 14 మంది సభ్యుల ప్రమాణ స్వీకారం – ఎంపీపీ, వైస్ ఎంపీపీ ఎన్నిక:
- ముందుగా, సభకు హాజరైన 14 మంది టీడీపీ ఎంపీటీసీ సభ్యులతో ఎన్నికల అధికారులు ఒక్కొక్కరిగా ప్రమాణ స్వీకారం చేయించారు. అనంతరం, మండల పరిషత్లో టీడీపీకి స్పష్టమైన ఆధిక్యం ఉండటంతో నిబంధనల ప్రకారం ఎంపీపీ, వైస్ ఎంపీపీ ఎన్నికల ప్రక్రియను చేపట్టారు. ఇందులో ఎంపీపీగా సరితా రమణమూర్తిని, వైస్ ఎంపీపీగా సునీల్ ని ఏకగ్రీవ ప్రతిపాదనలతో సభ్యులు ఎన్నుకున్నారు. ఎన్నికల ప్రక్రియ పూర్తయిన అనంతరం రిటర్నింగ్ అధికారి (ఆర్వో) మరియు ఎంపీడీవో అధికారికంగా సభ్యులందరితో సంతకాలు చేయించి ధృవీకరణ పత్రాలు అందజేశారు. నూతనంగా ఎన్నికైన ప్రజాప్రతినిధులందరూ పరస్పరం శుభాకాంక్షలు తెలుపుకుంటూ గ్రూప్ ఫోటోలు దిగారు.
- అభివృద్ధే ధ్యేయంగా ప్రజాసేవకే అంకితమవుతా: ఎంపీపీ సరితా రమణమూర్తి
- ఈ సందర్భంగా నూతన ఎంపీపీగా బాధ్యతలు స్వీకరించిన సరితా రమణమూర్తి మాట్లాడుతూ.. ముందుగా తనను ఆశీర్వదించిన చంద్రగిరి మండల ప్రజలకు, కూటమి నాయకులకు హృదయపూర్వక కృతజ్ఞతలు తెలిపారు. తెలుగుదేశం పార్టీ అధిష్టానం, చంద్రగిరి శాసనసభ్యులు పులివర్తి నాని, ఆయన సతీమణి పులివర్తి సుధారెడ్డి తనపై ఎంతో నమ్మకంతో ఈ కీలక బాధ్యతను అప్పగించారని పేర్కొంటూ, తన విజయానికి సహకరించిన కూటమి నాయకులు, కార్యకర్తలందరికీ పేరుపేరునా ధన్యవాదాలు తెలిపారు. కులాలు, మతాలు, ప్రాంతాలు, వర్గాలకు అతీతంగా చంద్రగిరి మండలంలోని అన్ని గ్రామాలను సమానంగా అభివృద్ధి పథంలో నడిపించేందుకు కృషి చేస్తానని ఆమె స్పష్టం చేశారు. మండలంలో ప్రధానంగా తాగునీరు, పారిశుద్ధ్యం, అంతర్గత రహదారులు, వైద్యం, విద్య తదితర మౌలిక సదుపాయాల కల్పనకు ప్రత్యేక ప్రాధాన్యత ఇస్తానని హామీ ఇచ్చారు. ఈ ఎంపీపీ బాధ్యతను ఒక అధికార హోదాగా కాకుండా ప్రజాసేవా కార్యక్రమంగా భావించి, నీతి నిజాయితీలతో ప్రజలకు అందుబాటులో ఉంటూ పనిచేస్తానని, మండల అభివృద్ధికి ప్రతి ఒక్కరూ సహకరించాలని ఆమె కోరారు.