చల్లపల్లి-విజయవాడ రోడ్డుపై విరిగిపడిన చెట్లు తొలగింపు

చల్లపల్లి, మేజర్ న్యూస్: ఆర్నబ్ తుఫాను ప్రభావంతో చల్లపల్లిలో రాత్రి నుంచి ఎడతెరిపి లేకుండా వర్షం కురుస్తోంది. బలమైన ఈదురుగాలుల కారణంగా చల్లపల్లి-విజయవాడ రోడ్డులోని వక్కలగడ్డ సమీపంలో చెట్లు విరిగిపడి ప్రధాన రహదారికి అడ్డంగా పడ్డాయి. దీంతో వాహనాల రాకపోకలకు అంతరాయం ఏర్పడింది. బుధవారం ఉదయం ఇండియన్ రెడ్‌క్రాస్ సొసైటీ జిల్లా చైర్మన్ డాక్టర్ డి.ఆర్.కే. ప్రసాద్ ఆధ్వర్యంలో రెడ్‌క్రాస్ వాలంటీర్లు, స్వచ్ఛ సుందర చల్లపల్లి కన్వీనర్ డాక్టర్ తరిగోపుల పద్మావతి ఆధ్వర్యంలో కార్యకర్తలు, స్థానికులు రంగంలోకి దిగి రోడ్డుకు అడ్డంగా ఉన్న చెట్లను తొలగించారు. దీంతో వాహనాల రాకపోకలకు మార్గం సుగమమైంది. ఈ కార్యక్రమంలో పంచాయతీ ఈఓ పీవీ మాధవేంద్రరావు తదితరులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, అవనిగడ్డ నియోజకవర్గం, కృష్ణాజిల్లా.