బీటెక్ విద్యార్థి బలవన్మరణం
గాజువాక, మేజర్ న్యూస్ : బ్యాక్‌లాగ్స్ కారణంగా పైతరగతికి ప్రమోట్ కాలేదన్న మనస్తాపంతో ఓ బీటెక్ విద్యార్థి ఉరివేసుకుని ఆత్మహత్య చేసుకున్నాడు. దువ్వాడ పోలీసుల వివరాల ప్రకారం.. ఏతపాలెంకు చెందిన కొండ్రపు వెంకట్రామ్ చరణ్ (21) కుటుంబంతో కలిసి గాజువాక రాజీవ్‌నగర్‌లో ఉంటున్నాడు. పంజాబ్‌లోని లవ్లీ ప్రొఫెషనల్ యూనివర్సిటీలో బీటెక్ మూడో ఏడాది చదివిన చరణ్‌కు 14 సబ్జెక్టులు బ్యాక్‌లాగ్స్ ఉండిపోవడంతో నాలుగో ఏడాదికి ప్రమోట్ కాలేదు. దీంతో తీవ్ర నిరాశతో ఇంటికి తిరిగివచ్చిన అతడు, శనివారం తల్లి, సోదరి పనిపై బయటకు వెళ్లిన సమయంలో గదిలో సీలింగ్ ఫ్యాన్‌కు ఉరివేసుకున్నాడు. రాత్రి ఇంటికి వచ్చిన కుటుంబ సభ్యులు ఎంత పిలిచినా పలకకపోవడంతో తలుపులు బద్దలుకొట్టి చూడగా విగతజీవిగా కనిపించాడు. దువ్వాడ పోలీసులు కేసు నమోదు చేసి దర్యాప్తు చేస్తున్నారు.
రిపోర్టర్ : కోటిరెడ్డి, గాజువాక, విశాఖపట్నం
