బాలబాలికలకు సమాన హక్కులు కల్పించాలి విద్యార్థులకు న్యాయవ్యవస్థపై అవగాహన అవసరం: జడ్జి హిమబిందు
వత్సవాయి: మగపిల్లలతోపాటు ఆడపిల్లలకు కూడా తల్లిదండ్రులు సమాన హక్కులు, అవకాశాలు కల్పించాలని జగ్గయ్యపేట జ్యుడీషియల్ ఫస్ట్ క్లాస్ మేజిస్ట్రేట్ హిమబిందు అన్నారు. వత్సవాయి మండలం భీమవరం గ్రామ పరిధిలోని శ్రీ తక్షశిల పాఠశాలలో జాతీయ న్యాయ సేవల దినోత్సవం సందర్భంగా న్యాయ విజ్ఞాన సదస్సు నిర్వహించారు.ఈ సందర్భంగా ఆమె మాట్లాడుతూ.. న్యాయం అందరికీ హక్కు, న్యాయం అందరికీ సమానం అనే నినాదంతో విద్యార్థులకు న్యాయవ్యవస్థ, చట్టాలపై అవగాహన కల్పించారు. ప్రతి విద్యార్థి చట్టాలపై అవగాహన కలిగి ఉన్నప్పుడే సమాజంలో నేరాలు, ఘోరాలను అరికట్టేందుకు అవకాశం ఉంటుందని తెలిపారు. బాలికలపై వేధింపులకు పాల్పడితే చట్టప్రకారం కఠిన చర్యలు తీసుకుంటామని హెచ్చరించారు. బాలికలపై ఎలాంటి వివక్ష చూపకూడదని, ఆడపిల్లలకు సమాన అవకాశాలు కల్పించాలని సూచించారు.విద్యార్థినీ విద్యార్థులు తల్లిదండ్రుల ఆశయాలను నెరవేరుస్తూ క్రమశిక్షణతో చదువుకుని ఉన్నత శిఖరాలను అధిరోహించాలని ఆకాంక్షించారు.ఈ కార్యక్రమంలో బార్ అసోసియేషన్ వైస్ ప్రెసిడెంట్ మాధురి, న్యాయవాదులు దాసరి నాగేశ్వరరావు, మెట్టెల ఆంజనేయులు, డీవీ కృష్ణగాంధీ, పారాలీగల్ వాలంటీర్ మన్నేపల్లి మురళి, మండల లీగల్ సర్వీసెస్ అథారిటీ ప్రతినిధి అనూష తదితరులు పాల్గొన్నారు.
